Vawiin chawhma khan Champhai DC Conference Hall-ah Pu Mark Lalthanliana, Addl DC hovin Republic Day 2020 lawmna tura inpuahchahna thlirho a ni.

He hun kaihruaitu Pu Mark Lalthanliana, Additional DC chuan Republic Day chu India ram ni pawimawh berte zinga mi a ni a, mitinte’n he ni hi neitu thinlung puin kan ngaipawimawh theuh tur a ni, a ti a. Hlawhtling taka he ni puala hun hman anih theihna turin chanvo neitu zawng zawngte thahnemngai taka mahni chanvo theuhte hlen chhuak tur leh inpaizawn tawn zel turin a chah a ni.

Meeting-ah hian chanvo hrang hrang neitute hnen atangin hmalak tawh dan leh mamawh awm angte ngaihthlak niin, bawhzui dan turte sawiho ani a. India ram ni pawimawh pahnih Republic Day leh Independence Day lawmna huna rimawi tumtu tur bik Pipe Band changtlung tak neih anih theihna tura hmalak nise tih a ni a. Heng bakah hian Republic Day lawmna hmun tur Chhangphut Field cheimawi dan turte, tui leh eng pek, venhim hna leh inpuahchahna dangte sawiho a ni bawk. Republic Day puala infiamna huaihawt tur Football leh Tennis inelna atana sum ruahman sawiho niin pawm a ni bawk.

Kumin Republic Day hi Pathianni anih vangin a lawmna hun hi inkhawm tibuai lo turin zing dar 7:30 ah Chhangphut Field-ah hman tur a ni a, he hunah hian Champhai Bawrhsap Pu SL Naveen, IAS chu khuallian a ni ang. Republic Day puala Parade turte inpuahchahna hi tukin January Ni 21, 2020 zing dar 7 atangin neih tan a ni tawh a, January Ni 23 thleng neih tur niin, final rehearsal chu January Ni 24, 2020 ah neih ani ang. Republic Day lawmna hunah hian naupang leh thalaite ruihhlo leh a kaihhnawih hrang hrang laka an fihlim theihna tura hmalakna Project HIMNA-MADAT kaltlanga video tawi insiamsiak lawmman semchhuah tum a ni bawk.

Republic Day Celebration Committee chuan Republic Day chu India ram ni pawimawh bik anih ang ngeiin Sawrkar hnathawk, Sikul Naupang leh Mipuite chu he ni hi ngaipawimawha kal theuh turin a sawm a ni.

Vawiin Republic Day atana inpuahchahna thlirhonaah hian Pu Rex Zarzoliana, SP Champhai leh chanvo nei sawrkar Department hotute an tel a ni.