Lunglei Bawrhsap thar Pu V. Lalsangliana, IAS chuan a posting thar zawm tawhin vawiin chhun dar 12:00 khan a office chamber-ah Lunglei District media mite kawmin inhmelhriatna hun an hmang a, Lunglei District hmasawnna tura hmalakna hrang hrang te an sawiho.

Lunglei Bawrhsap thar Pu V. Lalsangliana, IAS chuan media mite chu mipuite sukthlek siam sak tu leh mipui rawngbawltu pawimawh tak an nih thu sawiin Lunglei media mite nen inhmelhriatna leh inkawmhona hun tha tak an hmang thei chu lawmawm a tih thu a sawi a. Lunglei District dinhmun hrechiang tu leh kawng hrang hranga District hmasawnna thlithlaitu leh viltu an nih avangin hun lo kal zel turah an thurawn leh finchhuahna te a mamawh tur thu a sawi a. Sawrkar hmalakna hrang hrang puanzar kawngah leh Department-te finchhuah kawngah media mi te chu kawng tinrenga thawhho pui a duh thu sawiin a tha zawnga mipuite kaihruaitu leh ram hmasawn zelna tura kawng kawhhmuhtu ni zel tura tan la turin a chah a. Lunglei District ti hmasawn zel turin chak taka ke pen zel a tum thu Lunglei DC hian a tarlang bawk.

Lunglei District MJA President Pu H. Lalthansanga leh member dangte pawhin thu sawiin an thil ngaih pawimawh leh mamawhte DC hnenah an thlen a, ram leh hnam, District hmasawnna tura lungrual taka hmalak tlan an duh thu an sawi a. Media mi te nena inhmelhriatna hun tha tak a buatsaih avangin DC chungah lawmthu an sawi a,MJA tana inhawng taka hnathawk duh mi a nih naah a chungah lawmthu an sawi bawk. Inkawmhona ah hian Lunglei District huamchhunga Kawrpuichhuah border trade kalpui dan tur te, Road Protection Squad hmalaknate, 132 Kv Alternative Line hna kal mek chungchang te, Chapchar Kut lawm dan chungchangte sawiho a ni.

 Vawiin inkawmhona ah hian Lunglei Additional DC Pu R. Vanrengpuia, SDO (S) Pu Lalnundika, DIPRO Pi C. Lalremruati te an tel a. Lunglei District MJA-te an President Pu H. Lalthansanga hovin member thahnem tak an kalkhawm a ni.