Vawiin hi National Immunisation Day a ni a, he ni pual hian Lawngtlai District-ah chuan naupang kum nga hnuai lam hnena zenghri danna (vaccine) pek beihpui thlak tan a ni.

Don Bosco School, Lawngtlaia beihpui thlak hawnnaah Lawngtlai Bawrhsap Pi Shashanka Ala, IAS chuan Lawngtlai District chu ram dang - Myanmar leh Bangladesh te nen ramri thui tak intawm a nih avangin zenghri danna hi a la turte'n kim taka an lak a pawimawh a, thenawm ramah zenghri vei hmuh chhuah a la nih avangin fimkhur a ngai zual a ni, a ti.

Lawngtlai District chhungah hian khua 198 awmin, vawiin atang khan naupang kum nga hnuai lamte zenghri danna pek hi tan nghal a ni a. Khua leh veng tinah a pekna tur hmun bik ruahmanah pek phawt tur niin, heta pek kim lohte chu an in lamah kal chilhin pek an ni leh dawn a ni.