No.3634/2021-2022

Aizawl, 12th January, 2022: Vawiin chawhma dar 11 khan District Level Republic Day Celebration Committee, Champhai District chu an Chairman Pi Maria C.T Zuali, District Bawrhsap hovin Republic Day 2022 lawm dan tur ngaihtuahin DC Conference Hall-ah an thukhawm.

He hun kaihruaitu Bawrhsap Pi Maria C.T Zuali chuan hripui leng mek avangin Republic Day chu mipuite nen a huhova ropui taka lawm ni thei dawn lo mah se, sawrkar duan inkaihhruainate zawm chung zelin urhsun taka lawm tura ruahmanna neih a tul thu a sawi a. Republic Day urhsun taka lawm a nih theih nan mahni chanvote hneh taka hlen theuh tum turin mawhphurhna latu zawng zawngte a ngen a ni.

Thukhawm chuan Champhai District-a Republic Day lawmna pui ber chu DC chenna hmun Jericho Garden, Keifangtlangah Khuallian Pi Maria C.T. Zuali, District Bawrhsap hovin sawm bikte nen zing dar 8 atanga neih tan nise tiin a rel a. January ni 25, 2022 chawhnu dar 2 ah inpuahchahna leh enchhinna hnuhnung neih nise tih a ni a. Meeting chuan Republic Day pualin kuthnathawktu hlawhtlingte, infiamna, hnathawhna leh midang tana luanchhuah kawnga mimal chawimawi phute chawimawina hun buatsaih nise a ti a, Line Department leh pawl dangte chu chawimawina pek phute lo ngaihvena bawhzui tura tih an ni a. Sawrkar Department hrang hrangte hna chanpual siamfel nghal a ni bawk.

Covid-19 hripui leng avangin Republic Day lawmna hunah hian Parade Contingent leh Pipe Band-te an awm dawn lova, Mizoram Police Contingent ten hnam puanzar chibai an buk dawn a ni. Republic Day lawmna hun hi mipuite tana thlir theih turin Cable TV pahnih CCN leh LCN ah te Live Telecast hmanga chhuah nise tih a ni bawk.

Vawiin meeting-ah hian Pu Henry C.Lalrawnkima, Addl. DC, Pu C.Lalengliana, Addl. SP, Sawrkar Department hotute, NGO aiawh leh Chanchinbumite an tel a ni.

Attachment

  • Loading attachment...