3206/2022-2023
Champhai, the 10th January, 2023: Republic Day 2023 lawm dan tur relin Champhai District Level Republic Day Celebration Committee chu an Chairman, District Bawrhsap, Pu James Lalrinchhana hovin vawiin chawhma dar 11:00 khan DC Conference Hall-ah an thukhawm.

He hun kaihruaitu Bawrhsap Pu James Lalrinchhana chuan Champhai District-ah harsatna lian tham thleng lova boruak muanawm tak hnuaia Krismas leh Kumthar hman a ni chu entawntlak tiin, District mipuite kumthar chibai a buk a. District mipuiten thlamuang taka hunpui an hman theih nana hmalatu leh tha thawhtute zawng zawngte fakawm a tih thu a sawi bawk. Republic Day 2023 lawm tur chu India ram ni pawimawh bik anih anga theihtawp chhuaha inpuahchah a tul thu leh awmze nei taka lawm a tul thu a sawi a. District tana ni chhinchhiah tlak leh hmellana tur anih angin mawhphurhna nei hrang hrang leh chanvo nei tura ruatte chu Republic Day hlawhtling taka lawm anih theih nana thahnemngai taka thawk theuh turin a chah a ni.

Thukhawm chuan Champhai District-a Republic Day lawmna pui ber chu Chhangphut Field-ah Khuallian Pu James Lalrinchhana, District Bawrhsap hovin ropui taka lawm nise a ti a. Zing dar 6 ah sawrkar pisa, zirna leh mimal in-ahte hnam puanzar pawtpharhin zing dar 10 atangin Chhangphut Field-ah Republic Day lawmna ropui taka neih tum a ni a. Hemi hnu hian chhun dar 12 ah Jericho Garden, Keifangtlang-ah sawm bikte pualin VIP's At Home neih nise tih a ni bawk a. Kumin Republic Day lawmnaah hian School contingent, Unarmed contingent leh Armed contingent-te tel thei turin meeting chuan a beisei a, tul angte buaipui turin SP kaihhruai Sub-Committe din nghal a ni bawk. Final rehearsal chu January ni 24, 2023 ah neih nise tih a ni a. Sawrkar department hrang hrangte hna chanpualte siamfel nghal niin, Republic Day ropui taka lawm anih theih nan mahni chanvo theuh hneh taka hlen turin meeting chuan mawhphurhna latu zawng zawngte a ngen a ni.

He hunah hian Department hrang hrangte thawhlawm pek tur zat bithliah niin, Celebration Committee chuan phal taka tawiawm theuh turin a ngen a. Kumin Republic Day puala infiamna huaihawt tumte atanga dilna lutte sawiho anih hnuah pawm a ni a. Kumin Republic Day pual hian CDFA Second Division Football Tournament buatsaih mek a ni a; heng bakah hian Republic Day lawmna hunah hian faina kawnga tithate leh DC Trophy Republic Day Chess Tournament-a tithate hnenah lawmman sem chhuah tum a ni.

District Level Republic Day Celebration Committee chuan Republic Day chu India ram ni pawimawh bik anih avangin sawrkar hnathawk, zirlai leh khawtlang mipuite chu he hun hi ngaipawimawha tel theuh turin a sawm a ni.