3207/2022-2023
Kawrthah, 10.01.2023: Vawiin khan Kawrthah leh Tuidam ah PMJVK Scheme atanga sum hmuh hmanga Synthetic Turf Football Ground leh MSSC-TATA Trusts Football Academy, Kawrthah Centre hawnna buatsaih a ni a. Chief Minister Pu Zoramthanga chu khuallian niin a hawng. Sports & Youth Services Minister Pu Robert Romawia Royte chu khualzahawm a ni bawk.

Chief Minister chuan vawiinah hian Mamit district vanneihna a lan zel thu sawiin, Kawrthah a Residential School siam hmalakna kal mekah a ken tel Football turf changtlung tak vawiina hawn bakah zirna in leh hostel building sak mek te chu lawmawm tiin, thangtharte tan hmasawnna lian tak a thlen a beisei thu a sawi. Chief Minister chuan covid hripui len laiin hmalakna tam tak thuanawp phah mahse, sawrkar laipuiin hmanna tur sum ranw bituk sa hmangin tuna khelmual tihchangtlun hna hi ngawrh taka hmalak a nih thu a sawi a. TATA Trusts nen thawk dun a football khelh zirna chu a hlawhtlin ngei theih nan sawrkarin hma a lak thu a sawi bawk a. Heng atang hian Chief Minister chuan thalai thiam tak tak an inzirchhuah ngei a beisei thu a sawi a. Chutihrual chuan hlawtlinna dik tak hmu tur chuan taksa hrisel neih a tul thu sawiin, tunlaiah kan hriselna tichhe thei min runtu zu leh ruihhlo lakah hian indopui kan puan a ngaih takzet thu a sawi bawk. Khawvel huapa inkhelthiam te pawhin taksa fit leh hrisel an ngaihpawimawh thu a sawi a. Tumruhna, inpekna nen an thil tumah hlawhtling ngei tura theihtawp chhuah turin naupang leh tleirawlte chu a fuih a. Hlawhtlinna chu an kutah a awm a ni, a ti.

Khualzahawm Pu Robert Romawia Romawia pawhin thu sawiin, TATA Trusts academy thlenna tura Kawrthah thlan a ni chu a lawm thu a sawi a. Mumal takin coach hlawh neiin in enkawlna hnuaia inhrual tur a nih dan sawiin, he academy a zirchhuakte chu an hlawhtlin ngei a beisei pui. Sports Minister chuan sawrkar laipui pawhin tun dinhmunah zirna bakah infiamna (sports) hi a ngaihpawimawh thu sawiin, New Education Policy pawhin zirlaite'n sports uar tur tih tarlan a nih thu a sawi. Field enkawl zui dan chungchangah a khaw mipui te'n tangkai takin, dimdawi tak si a an hman a beisei thu sawiin, inkhel mi ten football field an ngaihhlut thin thu a sawi a. Chutihrual chuan zau thei ang bera khawchhung mai bakah chhehvel khua te tan thlenga tangkai a chhawr a nih theih nan management committee te pawhin ruahmanna an siam thiam a beisei thu a sawi bawk.

Hachhek bialtu MLA Pu Lalrindika Ralte pawhin thu sawiin, a bial chhunga hmasawnna nasa tak hmuh tur a awm chu lawmthu a sawi a. Sawrkar hi mipui ta niin, sorkar ta pawh mipui ta a nih avangin vawiin khelmual hawn pawh uluk taka enkawl chhunzawm chu kan mawh a ni, a ti. Pu Lalrindika Ralte chuan keimahni a theihna awm a lanchhuah nan tawrhna te, inthununa te, chhelna kan neih a tul thu sawiin, chung tello chuan bungrua tha ber ber inchhapwsak mah ila hlawhtlinna a awm theihloh thu a sawi a. Vawiina field hawn that chu hmang tangkai a hlawhtlinpui ngei turin duhsakna thalaite a hlan a ni.

Vawiin programme ah hian Chief Minister hi Dy. Govt. Chief Whip Pu Lalrintluanga Sailo, Horticulture Development Board Vice-Chairman Prof. F. Lalnunmawia, Road and Infrastructure Development Board Vice-Chairman Er. H. Lalzirliana, Manpower Development Board Vice-Chairman Pu Zothantluanga, Commerce & Industrial Development Board Vice Chairman Pu K. Laldawngliana, Youth Affairs and Tourism Board Vice-Chairman Pu T.C. Pachhunga, Ex-MLA, Adviser to CM pahnih Pu C. Lalramzauva leh Er. (Rtd.) K. Lalsawmvela te, Home Commissioner Pu H. Lalengmawia leh sawrkara hotu pawimawh dangte'n an tawiawm a ni.

Kawrthah a football ground leh football academy hawnna inkhawm te hi Mizoram State Sports Council Secretary Pu John Tanpuia chuan kaihruaiin, Pu James Lalramnghaka, Assistant Engineer, Mizoram State Sports Council chuan report a pe a. Kawrthah South VCP atang te, Mizoram Football Association, Mamit District Football Association, Kawrthah GSA aiawhte atangin leh Footballer Jeje Lalpekhlua hnen atangin thusawi tawi ngaihthlak a ni bawk. Mamit DC leh District Sports Committee Chairman ni bawk Pu Lalnunhlua chuan lawmthu sawiin hun a khar a ni.

REPORT:
1) Synthetic Turf Football Ground, Kawrthah: Construction of Residential School, Kawrthah, Mamit District siamna tur atan hian kum 2019-2020 khan PMJVK Scheme atangin Rs. 3,286.34 lakhs administrative approval hmuh a ni a. He Project hnuai ah hian Construction of Playground with Artificial Turf at Residential School, Kawrthah, siam nan Rs. 549.91 lakhs hmuh a ni a. He khelmual phullem phahna tur lungphum hi ni December ni 10, 2020 khan Chief Minister chuan a lo phum tawh a ni. He hna thawk tur atan hian tender chhuah a nih hnuah, M/S Décor India, GS Road, Guwahati chu thlan a ni a. March ni 15, 2021 khan hnathawh tan niin, October ni 17, 2022 khan tha taka zawh fel a ni.
He Project hnuai ah hian heng hna hrang hrang te hi thawh a ni :-
a) Football Turf-Synthetic Football Turf phah chin area hi 105 x 60 mts. niin, play area hi 100 x 56 mts. a ni. He phullem phahna atan hian New Technology Drain Board System hman niin, a sir kil hnih ah tui paihna tha tak siam a ni a. Artificial Grass hi ACT Global Company, USA te siam a ni a, Goal Post leh Net bakah Corner Flag-te pawh dah tel a ni bawk.
b) RCC Gallery - RCC Gallery hi 18 x 3 mts. a zau a sak a ni a. Mi 100 vel thu leng thei tura siam a ni.
c) Pavilion for Football Ground - Pavilion hi 18 x 6 mts. a zau chhawng hnih a sak a ni a. Basement Floor-ah hian Dressing Room pahnih (2 nos.) leh toilet pahnih (2 Nos) te dah a ni a. Ground Floor hi Pavilion atan a ruahman niin, mi 60 vel thu leng thei tura siam a ni.
d) Fencing - Playground kual chhuak hian PVV coated chain link Fencing siam a ni a, 2 mts.zel ah ban phun niin, fencing san zawng hi 2.20 mts. a ni a. Pavilion zawn ah Main Gate 4mts. a zau siam a ni bawk a. Goal Post hnung zawn ve ve ah Emergency Gate 1.2 mtrs a zau dah tel a ni.

2) Mizoram State Sports Council - TATA Trusts Grassroots Football Academy, Kawrthah Centre: Mizoram Sawrkar chuan Football infiamna a hma kan sawn zel theihna atan, a bulthum atanga naupang te'n football skills leh technique an zir theihna turin India ram pum huapa hemi kawnga hma la tu TATA Trusts nen thawhhona thuthlung ziakin, Mizoram State Sports Coundil - TATA Trusts Grassroots Football Training Academy a din a. He academy hian Mizoram hmun hrang hrang ah centre sawmruk (60) awm turin ruahman a ni. He project hi kum khat atan kalpui phawt ani anga, a tul dan angin leh mamawh dan anga chhunzawm zel tur a ruahman a ni. Tun dinhmunah hian centre zawng zawng ah trainees 1800 vel an awm mek a, centre pakhat ah trainee 30 zel awm tur a ni.

He academy atan a trainer tur te pawh hi uluk taka thlan an ni a, AIFF/ AFF FA hnuaia Coaching Licence neite an ni. Trainer tha te thlan an nih mai bakah Sports Science support - trainees te ei leh in (Diet) kawngah te Dietician in vil in, fitness training ah te leh physiotherapy lamah te pawh mithiam te`n an enkawl reng dawn a ni.

He project atan hian Rs. 80 lakhs ruahman a ni a. TATA Trusts lam hian Rs. 50.00 Lakhs thawhin, Mizoram Sawrkar hian Rs. 30.00 Lakhs in a do let ve bawk a ni.