3208/2022-2023
Aizawl the 10th January 2023 : Vawiin khan YMA Chiahpui branch chuan an dincham kum 60-na Diamond Jubilee chu Chiahpui Community Hall-ah lawmna hun an hmang a, HRD Board Vice Chairman Dr L.Thangmawia'n khuallian niin a hmanpui a, Jubilee lungphun a hawng nghal a ni.

Dr. Thangmawia chuan Chiahpui Branch YMA in kum 60 a lo tling ta chu a lawmpui thusawiin he kum 60 chhunga Chiahpui YMA hruaitu leh member lo ni tawh zawng zawngte an fakawm hle a ni a ti a. Mahni tan ni lova midangte tana thawk thin pawl lian ber YMA hi zofate tana Pathian min pek, Pathian hming lam chunga kohhran hnaikaitute din a ni a, vawiin thlengin midangte tana malsawmna thlentu pawl ropui ber a ni chho ta zel a ni a ti.

Dr Thangmawia chuan ruihhloin kan thalaite Zoram hmun tinah a run mek a, hei hi kan hnam boral theihna hlauhawm berte zinga mi a ni a, kan ram leh hnam humhim turin ruihhlo laka YMA member te ruihhlo lakah kan fihlim a ngai a ni a ti.

A sawizelnaah Dr Thangmawia chuan tunlai naupang leh tleirawl/rawlthar te tan hian chhungkua, zirna sikul leh chawlhni sande sikul tih loh chu inzirtirna hmun a awm ta lo a. Henga fun kim sen ni si lo, khawtlang/Vantlang tana an puitlin hnua an mawhphurhna leh khawtlang leh ram tan bakah midangte tana inpekna kawnga kaihruai turin hmana YMA CHHANG ang deuh kha tunlai mila YMA in a kalpui theihdan awm se a duhawm hle a ni a ti.

He hunah hian kum 1963 a Chiahpui YMA branch lo dintu la dam Upa Dengchungnunga, Upa Ngamsangvunga , Pi Lalramthangi leh Pi Zahniamlovi te hnenah chawimawina thuziak hlan an ni a.

Jubilee pual hian khuallian hian YMA branch leh Chiahpui VC te hnenah portable PA Set a pe a, MUP leh MHIP te hnenah No a pe bawk a ni.

Jubilee lawmna inkhawm hi Pu Lalrinawma, President, Chiahpui YMA Br in a kaihruai a, Tv Darthanzuala, Treasurer in hunserh a hmang a, Upa Dengchungnunga, Vice President hmasa berin Souvenir a tlangzarh a, Upa K.Chawngzama, Adviser leh Pu Lalropuia VCP, Chiahpui ten thu sawiin Pu Biakthansanga, Chairman Jubilee Organising Committee in lawmthu sawiin hun a khar a ni.