3752/2024-2025

Champhai, 10th January 2025: Vawiin chawhma khan Champhai DC Conference Hall, Keifangtlangah District Bawrhsap Pu VL Remliana hovin India Republic Day 2025 kumin January Ni 26-a hman dan tur relin Champhaia Sawrkar Department hotute leh NGO aiawhte an thukhawm.

Pu VL Remliana, Chairman Republic Day Celebration Committee chuan Champhai District-ah boruak muanawm tak hnuaia Krismas leh Kumthar hman a ni chu lawmawm tiin, District mipuite kumthar chibai a buk a. Department hrang hrang Head of Office-te leh tlawmngai pawl hruaitu kalkhawmte chu District hmasawnna tura theihtawp chhuah chhunzawm theuh tur leh a theihna apiangah in tawiawm tlanga hma la thin turin a chah a. Republic Day 2025 lawm tur chu India ram ni pawimawh bik anih anga theihtawp chhuaha inpuahchah a tul thu leh awmze nei taka lawm a tul thu a sawi a. District tana ni chhinchhiah tlak leh hmel lanna tur anih angin mawhphurhna nei hrang hrang leh chanvo nei tura ruatte chu Republic Day hlawhtling taka lawm anih theih nana thahnemngai taka thawk theuh turin a chah a ni.

Meeting chuan kumin Republic Day lawmna hun chu Pathianni anih avangin inkhawm tibuai lo turin zingkarah zawhfel nise, hemi hnua buatsaih thin sawmbikte puala ei leh in siamte pawh thulh mai ni se a ti a. Republic Day lawmna hmun atan Chhangphut Field ruat a ni a, zing dar 6:00 ah sawrkar pisa leh mimal in-ahte hnam puanzar pawtpharhin zing dar 8:00 ah tan nise tiin rel a, Khuallian hi Sawrkar ruahhmanna ngaihchan nise tiin a rel a.Meeting chuan Republic Day chu kum dang ang bawkin urhsun taka hman leh nise, he ni pual hian Parade Contingent – Armed, Unarmed , School, Ex-Servicemen, NCC leh Band party te neih ni se tha a ti a, inelnaa tel leh tithate hnenah lawmman  pek ni se a ti bawk.

Vawiin thutkhawmah hian Sawrkar Department hrang hrangte mawhphurhna leh tihturte semrual niin, Member-te hnen atanga rawtna thlente sawiho a ni a. Republic Day puala Parade turte inpuahchahna chu January Ni 22 atanga 23 thleng neih nise, final rehearsal chu January Ni 24, 2025 ah neih nise tih ani bawk.

Republic Day Celebration Committee chuan Republic Day chu India ram ni pawimawh bik anih ang ngeiin Sawrkar hnathawk leh Mipuite chu he ni hi ngaipawimawha kal theuh turin a sawm a. Republic Day puala Football leh Volleyball inelna siam tura tanpuina sum dil leh pek dan turte pawh sum awm dan a zira pekchhuah ni se tih a ni bawk. He hunah hian Department hrang hrangte thawhlawm pek tur zat bithliah niin, Celebration Committee chuan phal taka tawiawm theuh turin a ngen a ni.

Vawiin Meeting-ah hian Sawrkar Department hotute, khawtlang hruaitute, NGO aiawh leh Chanchinbumite an tel a ni.