3753/2024-2025

Dated Hnahthial, the 10th January, 2025: Vawiin chawhma dar 11:00 khan DC Meeting Hall, Hnahthialah, Hnahthial District Beautification Committee chu an chairman, Pi Rita Lalnunmawii Pachuau, District Bawrhsap ni bawk kaihhruaiin ‘District Beautification Competition, 2025’ chungchang ngaihtuahin an thukhawm.

Meeting kaihruaitu, District Bawrhsap, Pi Rita Lalnunmawii Pachuau chuan UD&PA Department in 'District Beautification Competition, 2025' a buatsaih dawn thu a sawi a. Hemi atan hian February 14, 2025-ah District hrang hrang ten presentation pein an ruahmanna te an entir dawn tih sawiin hemi atan hian ruahmanna siam tur a nih thu a sawi a. He thutkhawmna a tel te chu tun atan mai ni lo, hun lo kal zel turah Hnahthial chu khawpui mawi anih theihna turin a eng zawnga ngaihtuahna seng turin a sawm a. Sawrkar department hrang hrang, tlawmngai pawlte leh mipuite chu he hmalakna thlawp a, theihtawp chhuahpui turin a sawm bawk a ni.

District Urban Development Officer (DUDO), Pu Hmingmawizuala chuan District Beautification Competition chungchang sawifiahin presentation a pe a. DUDO chuan District Beautification Competition hi Mizoram District-te inelna tur niin, tehfung hrang hrang duan sa hmangin khawpui cheimawi leh thuammawi kawngah inelna hi kalpui tur a ni a ti a. A ti tha district pathum ten cheng nuai sawmnga (Rs. 50 lakhs) theuh an dawng dawn a, district tel hrim hrim ten participatory prize cheng nuai hnih (Rs. 2 lakhs) an dawng dawn bawk a ni.

Hemi hnu hian hmalak dan tur hrang hrang ngaihtuah ho nghal niin District Beautification Competition atana hmun chei bik turte thlang felin DUDO Office lam chu Detailed Project Report (DPR) siam tura tih an ni a. February ni 4-ah meeting neih leh ni se ti a rel niin hetah hian DPR chu thlir ho nghal a ni ang.