Vawiin khan I&PR Auditorium, CHANEM Building-ah Champhai district chhunga retailer-te kohkhawm niin e POS Machine hman dan inzirtirna leh semna hun neih a ni.

He hun hi Pu Spencer Vanlalchhunga, DCSO Champhai chuan kaihruaiin Food Security Act hnuaiah ePOS machine hmanga hnathawh angaih tawh dawn avangin retailer kalkhawmte chu khawl thar hmanga hnathawh thiam ngei tura inzirtirna hun tha taka hmang turin a chah a ni.

Pu Lallawmawma, Co-ordinator Vision tech. chu chuan ePOS awmzia leh hman dan zirtirna a nei a. Powerpoint presentation hmangin khawl dinhmun bakah engtianga hman tur nge a nih tih te tarlangin, signal that lohna hmunah pawh hman anih theihna turin Online leh Offline Mode a awm thu a tarlang bawk.

Kalkhawm te'n chiang zawka an hriatthiam theihna turin a takin khawl hmanga tihchinna neih a ni a. ePOS (Electronic Point of Sale) khawl hi Bio-Metric khawl niin, retailer ten Buhfai an sem dawn in Ration Card a member tupawh Aadhar Card link te chuan an kut zungpui thla (finger print) lain Retailer hnenah ration an la thei dawn a ni. He khawl hi online a hman tur a nih rualin, Internet awm lohna ah pawh Off-line mode in a hman theih bawk a internet awmna hmunah data upload/download ve leh mai tur a ni.

Vawiin hian retailer 101 te ePOS machine leh Digital weighing Scale sem vek an ni a. Naktuk lamah retailer dang 90 te leh FCS&CA Staff ten training an nei chhunzawm ve leh ang.