Vawiin khan DC Conference Hall, Mamit-ah World Pulses Day hman a ni a. Dr. Lalrozama, IAS, District Bawrhsap chuan khuallian niin a hmanpui.

Khuallian chuan World Pulses Day hmang tura kalkhawm mipuite chibai a buk a. A bik takin kuthnathawktu he Ni hmang tura lokalte chuan an hlawkpui ngei a beisei thu a sawi. Be chu mihring hriselna atana tha tak anih avangin a eitu mihringte leh a leitu lamah harsatna a awm lova, tun aia tam zawk kan tharchhuah theihna turin a chingtu lamte tan la sauh sauh turin a chah. Be chu Sa chi hrang hrang kan ei thin aiin a hrisel a, mihring tan paitawih awlsam zawk anih angin ei uar deuh deuh turin kalkhawmte a chah bawk.

Wolrd Pulses Day Mamit-a hmannaah hian Pu C. Lalengzauva, DAO Mamit chuan tuna Mamit District-a chin tan mek Dal chi khat Arhar chungchang Power Point Presentation hmanga sawifiahin Be chin lama tui mi a ching duhte tan Arhar chi hi DAO Office, Mamit-ah a thlawna lak theih anih thu a sawi. Arhar chuan lei tha a siam theih avangin lo neitute'n an thlai chin karah te ching uar turin a chah nghal bawk.

He hunah hian National Nutrition Mission Co-ordinator, Social Welfare Department, Mamit pawhin thu sawiin Be thatna hrang hrang a tarlang a. Kum 50 hnuailam mipa tan nitin Gram 38 leh hmeichhe tan Gram 25 bakah Kum 50 chunglam mipa tan Gram 30 leh hmeichhe tan Gram 21 mihring hriselna atana kan mamawh thu a sawi. Be hian mihring hriselna hrang hrang a thlen thei a, thisen siamtu a tam avangin a bik takin raipuar te'n ei uar tur a nih thu a tarlang.

He hunah hian zawhna leh chhanna hun hman niin Mamit khawpui chhunga kuthnathawka eizawngtute an tel tha hle a ni.