Vawiin khan UD&PA Department Champhai buatsaihin Presbyterian English School (PES) Vengthlangah School naupangte tan bawlhhlawh leh thil hluihlawn atanga thil tangkai siam chhuah dan zirtirna hun ‘Workshop on Reuse, Reduce and Recycling waste’ tih chu buatsaih a ni. He hunah hian Pu K.Lalhmuakliana, District Urban Development Officer (DUDO) Champhai chu khuallian a ni.

Khuallian Pu K.Lalhmuakliana chuan tunlai khawvel bawlhhlawh pung zelah bawlhhlawh atanga thil tangkai  siam  chhuah a  tul thu a sawi a. Workshop chhim tura kalkhawmte  chu hun tha taka hmanga thil thar chhawrtlak tak zir chhuah tum turin  duhsakna a hlan a ni.

Swachh Bharat Mission (Urban)  hnuaia  hmalakna  Workshop hi Pi Zairemtluangi Khiangte, Principal PES, Vengthlang chuan a kaihruai a. Pu C.Lalengkima, Social Development Specialist, UD&PA Champhai in Workshop kalphung tur leh hmalak tawh dan a sawi bawk a ni.

He hunah hian Champhai khawpui a Middle School hrang hrang  12 atangin Zirlai leh Zirtirtu  100 vel an kalkhawm a. Workshop-ah hian Swachh Bharat Mission (Urban) Model School atana thlan PES Vengthlang, Champhaia thawk zirtirtuten   bawlhhlawh leh hluihlawn thil atanga thil hlu zawk siam chhuah dan nilengin an zirtir a ni.

UD&PA Department Champhai hian faina atan nasa takin hma an la mek a. Tun hnaiah hian inzirtirna leh inhrilhhriatna  lamte thlengin nasa takin an kalpui ve mek zel a, vawiina  Workshop pawh hi an hmalakna pakhat zing a mi a ni.