Vawiin khan Road Safety Week vawi 30 na chu kharna hun chu I&PR Auditorium, CHANEM Building, Champhaiah hman a ni a. He hun hi Pi Esther Leihang, SDC Champhai chuan khuallian niin a hmanpui a ni.

Pi Esther Leihang chuan thusawiin mipakhat chauh fimkhur hian awmzia a nei thui lova, mitin kan fimkhur vek loh chuan accident kan tawk zel dawn a ni, a ti a. Accident a thlenin a tuar tu chu mihring zel an ni a, thihna a thlen loh pawhin a nghawng hi kum rei tak chhung mihring taksaah a awm thin a, rualbanlohna a tam tak a thlen thin thu a sawi a.  Fimkhur hian damna leh himna mi zawng zawng tan a thlen a ni tiin,  Road Safety Week Vawi 30 na hi a khar a ni.

He hun hi Pu K. Lalhmuakliana, DTO Champhai chuan kaihruaiin lirthei chetsualna thlenna chhan tam zawk chu lirthei khalhtu fimkhur loh vang a ni a ti a.  Driver tam tak chuan lirthei chak taka khalh chung a mobile phone hman an ching a,  hei hian chetsualna tam tak a thlen a ni, a ti a. Driver lirthei khalh chunga mobile phone hmang an awm chuan passenger ten kan hauh ngam pawh a ngai a ni a ti bawk.

Pu Francis L Ralte, Addl. SP chuan MV Act leh Rules chungchang sawiin, lirthei hi a khalh thiam nazawngin an khalh ngawt a thiang lova, dan leh dun hnuaia intulut thei te chauhin an khalh tur a ni, a ti a. Lirthei khalh chungchangah dan leh dun kan ngaihpawimawh hi a tul hle a ni a ti a, Lirthei, hazard light nei chin khalhin dam lo phurh chauh a light chhit loh tur a ni a, kawng sir a tulbik thila ding zauh kan mamawh hunah pawh he hazard Light hi hman thin tur a ni a ti a. RRR danah chuan kawng kual ah lirthei a intawh dawn reng reng in dinglam a mi zawk chu ken zawk tur a ni a, dinglam ami chu dah lal zel tur a ni a ti a, kawngpui ah chuan lirthei aiin mihring ke a kal te hi an lal ber thu sawiin lirthei a sut palh an nih chuan a su tu chu thiam engang mahse mihring a sut miau avangin thiam loh chantir a ni tho thin thu a sawi bawk.

Accident thlentu tam ber driver ruih vanga thleng  chu a case a san thu sawiin cheng sang 2 chawi bakah lung in tan thleng in hrem theih an nih thu a tarlang a. Kum 15 atanga kum 44 inkarah lirthei khalhtu thiam loh vanga accident thleng hi a tam ber anih thu leh India ramah mi 3287 hi lirthei accident vangin nitin thi ang a ni a, Minute tin ah mi 16 accident vanga thi ziah ang a chhut a ni, a ti bawk. Heng bakah hian Pu Fancis-a hnen atang hian lirthei dan bawhchhiat theihna kawng hrang hrang leh dan bawhchhia hrem theihna awm te ngaihthlak a ni a, mipuite hian heng dan hi kan zawm a, kan zah a ngai a ni a ti a.  Traffic police duty awm loh avanga dan palzam ta mai sawi tur tam tak an awm thu sawiin,   chankanlohna a nih thu tarlangin mimal tinin Traffic dan chi hrang hrang te hi kan zawm chuan accident vanga thi leh ramtuileilo a awm hi  kan pumpelh thei dawn a ni tiin lirthei khalhtu leh mihring ke a kal te'n dan kan ngaihpawimawh a tul thu uar takin a sawi a ni.