2264/2022-2023

Champhai, the 11th October, 2022: Mizoram Information Commission (MIC), Deputy Commissioner's Office Champhai leh DIPRO Office Champhaite tangkawp buatsaihin vawiin chawhma dar 11:30 khan Right to Information (RTI) Act, 2005 Week hawnna leh inhrilhhriatna hun I&PR Auditorium-ah buatsaih a ni.

Khuallian Pu H.Dolianbuaia, Secretary, Mizoram Information Commission (MIC) chuan  thu sawiin, RTI Act chu kum 2005 ah parliament house pahnihah nikhat chhungin tlai khawmuang hauh lova pass niin President-in a pawmpui nghal a, kum 2006 ah Mizoramah pawh kalpui a ni, a ti a. October 5-12 chhungin India ram pumah RTI Week hmang vek tura tih a nih angin Mizoramah pawh remchan dan ang zela hman a ni, a ti bawk a. RTI Act Sec 4 in a phut angin department tinte website tha taka vawnga mipuite hriat tura tulte hrilhhriat kawnga beisei an nih thu sawiin, hemi kawngah hian hma la tha lo department 41 vel koh tawh an ni, a ti a. RTI Act hmalakna chu hna penhleh anga ngai lova hna kalphung pangngai, office hna zinga bet tlat a ni tih hre tur leh RTI zawhna zawttute puih leh mamawh pekchhuah kawngah theihtawp chhuah turin a chah a ni.

MIC Secretary chuan langtlang sawrkar din kawnga mi pawimawh tak tak sawrkar official-te chu an mawhphurhnate hlena an hnathawh dan dik takte tarlang thin turin a chah a. Thuneitu sang zawka thlen kher ngai lo tura tan la turte leh RTI zawhnate dan hnuaiah tha taka chhang turtein a chah a. Mipui tana rawngbawltu kan nih angin kan mawhphurhna tha taka kan hlenchhuah a ngai a, mipuiin an zawh duh leh tanpui an ngaih thlengin inhawn a ngai a, an chanvo neih an chan loh hi thil pawi tak a ni, a ti a. DAA, SPIO, SAPIO te mumal taka inruat leh dawrtute tana hriat mai theih tura inkawhhmuhna siam vek tura tih an nih thu leh remchan hunah endik tum a nih thu a sawi  bawk a. Mizoramah July ni 1, 2022 ah RTI Online Application hmanga kalpui tan a nih thu sawiin, tangkai taka hman a pawimawh thu leh awlsam zawkna tura hmalakna a ni tih a sawi a. Insawn leh pension hunah pawh registration tihfela charge inhlan a ngaih thu a sawi a.  Kalkhawmte chu inhrilhhriatna tam zawk neia langtlang sawrkar, sawrkar tha leh ram hmasawn siam kawngah theihtawp chhuah turin a chah a ni.  

Thusawitu dang District Resource Person Pu C. Lalthazuala, Asst. Commisioner of State Tax chuan ram hmasawn nana pawimawh tak RTI inhrilhhriatna neih tam a ngaih thu sawiin, RTI Act chu langtlang sawrkar a awm theih nan leh  mamawhna avanga nawrchhuah a ni a, kan zavaia that thlanna tur zalenna dar vuak rik hmanga siam a ni, a ti a. Kum 17 hmel a hmuh hnuah pawh hemi dan chhawr tangkai thiam tura inzirtirna kalpui nasat a tul thu sawiin, RTI Act chu dan malsawm, khua leh tuite chakna leh thil tih theihna petu a ni, a ti a. Pawl hming anga RTI Act kaltlanga zawhna siam theih a nih loh thu leh mimal anga zawhna siam a ngaih thu sawiin, district mipuite chu RTI hmelhriata inthlahrunna leh timna nei lova ziak kher lo pawhin online hmang ngaihven turin a chah.

RTI zawhna luh atanga ni 30 chhungin  document leh material awm sa leh neih chin atanga chhanna pekchuah tur a nih thu leh chhan danah vuivaina a awmin thuneitu sang zawk thlenga thlen zel theih a nih thu a sawi a. RTI zawhna chhan duh loh leh chhan tlai thlengin hremna siam a ni, a ti a. Dan tha tak awmze nei lova chhuah a hlauhawm thu sawiin, hmasawnna duh vang talin chhawr tangkai ila, midangte i zirtir ang u, tiin kalkhawmte a sawm a ni.

He hun hi Pi Esther Leihang, SDC Champhai chuan a kaihruai a. Dr.Lallawmkima, DIPRO Champhai chuan lawmthu sawiin hun a khar a. Hemi hnu hian Salvation Army Youth (SAY), Champhai Vengthlang Corps ten RTI Street Play an entir bawk a ni.