2263/2022-2023

Aizawl, the 11th October 2022:  Vawiin khan Raj Bhavan-ah Prof. Haragopal Reddy, Chancellor, ICFAI University Mizoram hna rawn zawm thar leh a thawhpui senior faculty ten  Governor Hari Babu Kambhampati an kawm. 

ICFAI Mizoram hotuten Governor an kawmnaah hian  Chancellor thar chuan ICFAI Mizoram hmasawnna turin theih tawp chhuah a tum thu a sawi a. ICFAI Mizoram tana hmalakna pawimawh deuh an neih tur te pawh a sawi tel bawk a ni.

Governor Hari Babu Kambhampati chuan ICFAI Mizoram hotute nen inkawmna an lo neih tawh thin thu a sawi a. ICFAI Mizoram dinhmun te pawh engemaw chen a hriatpui thu sawiin theih tawp chhuah zel turin Chancellor thar leh a thawhpuite chu a fuih a. ICFAI University lo chu Mizoramah private university dang an awm loh avangin ICFAI mawhphurhna chu a sang hle a. ICFAI Mizoramah hian thalaiten eizawnna atan leh hnathawh tur hmuhna atana tangkai tur zirna - skill development lam, a bikin  healthcare leh hospitality sector lam te uar se a duh thu a sawi bawk a ni.

ICFAI Mizoram hotute hian kumin November thlaah Convocation an neih tur thu sawiin he hunah hian Governor chu khuallian atan an sawm nghal bawk a ni.

Meeting-ah hian Prof. RP Vadhera, Vice Chancellor, Icfai University mizoram, Dr. Damodar Reddy, Director, icfai University coordination department leh Dr. David Lawmzuala, Registrar, Icfai University Mizoram te pawh an tel a ni.

Attachment

  • Loading attachment...