2262/2022-2023

Aizawl 11th October 2022: Programme Management Unit (PMU), PHE Department, Government of Mizoram leh State Institute of Rural Development & Panchayati Raj (SIRD&PR), Mizoram tangkawp buatsaihin “Skill Training for Electrician & Plumber General  under Jal Jeevan Mission (JJM)” chu SIRD&PR, Durtlang Leitanah vawiin ni 11.10.2022 khan a hawnna neih a ni a, Er. H. Duhkima, Director, PMU, PHE Department chuan Khuallian niin he training hi a hawng a ni.

Training hawnna hun Pu Khawlsiamthanga Khawlhring, Associate Professor, SIRD&PR, Mizoram kaihhruaiah hian Er. H. Duhkima chuan ram leh hnam humhalhna pawimawh tak chu vawiina kan training ang hi a nih thu sawiin, JJM hnuaia Electrician leh Plumber General hna hi hna hnuaihnung nia an ngaih tlat chuan tui tak leh taima takin an thawk thei dawn lo a ni, a ti a. Midang mamawh petu tur kan ni tih hria a, taima taka hna thawk turin leh chhawrtlak ni ngei turin kalkhawmte a fuih a. Kan ramah mistiri leh mechanic hnamdang an tam em em a, heng mite kan nekchhuah theihna pawimawh tak chu an hnathawh ang hna kan thawh theih hi a ngai a ni, a ti bawk.

Khuallian chuan chhawrtlaka kan hna kan thiam a, kan taimak a, a ruaitu lungawina tura hna kan thawh thin a ngai a ni tih kan hriat reng a ngai a. Midangte chhawrtlak leh chhawr chak kan nih theih nan tawrhchhelna, zaidamna leh inngaihtlawmna te kan neih a ngai a, mi rintlak leh rinawm kan nih a ngai a ni, a ti a. Kan kuthnu a mamin, kan uluk tur a ni a, min chhawrtute mittlunga hna kan thawh fo a ngai a ni, a ti bawk. 

Er. H. Duhkima chuan hna tha taka thawk thei tur chuan ruihtheih thilah kan fimkhur a pawimawh thu sawiin, rui chunga hnathawh chu kuthnu a mam lova, min chhawrtute mit kan tlung thin lo a ni, a ti a. Ram leh leh hnam humhalh nan thahnem ngai taka training nei a, chhawrtlak ngeia hna thawk thei tura inzir tura kalkhawmte chahin, he training hi a hawng a ni.  

Training hawnna inkhawmah hian Pu Lalhmunsanga Hnamte, Director, SIRD&PR pawhin thu sawiin, Certificate dawng thei ngei tura thahnem ngai taka training nei tura fuihin, chhawrnahawm leh chhawrtlak ni ngei thei tura inbuatsaih turin training nei tura kalkhawmte a sawm a ni.  

Training hawnna hunah hian Er. LR. Lalrinmawia Hnamte, Faculty chuan training neih dan tur tlangpui leh Training chhunga hriattur pawimawhte sawina neiin, Pu K. Vanlaldika, Faculty chuan lawmthu sawiin he training hawnna hi a khar a ni.

He training-ah hian khaw hrang hrang atangin Plumber zir tur mi 27 leh Electrician zir tur mi 19 an kalkhawm a, SIRD&PR Faculty leh trainer-te’n zirtirna an pe dawn a ni.