2261/2022-2023

Lunglei the 11^th October, 2022 – Deputy Commissioner’s Office, Lunglei District hmalaknain November ni 10 atanga November ni 12 chhungin Lungleiah lung lam natna leh cancer a thlawna inentirna ‘Cardiology & Oncology Free Clinic’ neih a ni dawn.

He hmalakna hi Corporate Social Responsibility kaltlanga neih tur niin India ram hmun hrang hrang atangin doctor leh medical lam mithiam mi 15 rual an lo kal dawn a ni.

He Free Clinic neih tur chungchangah hian vawiin chawhma khan Lunglei DC Pu Kulothungan A kaihhruaiin a office chamber-ah Press Meet neih a ni a. Lunglei DC Pu Kulothungan A chuan Lunglei leh a chhehvel District-ah te lung lam doctor an awmloh avangin mipuiin harsatna an tawk fo thin a ni tiin he harsatna hi engemaw chen sutkian anih theihnan Free Clinic hi ruahman anih thu a sawi a. Lunglei District mai bakah Hnahthial, Lawngtlai leh Siaha District mipuite pawh an rawn inentir theih tur thu a sawi.

Free Clinic ah hian lung lam doctor leh cancer enkawltu doctor ten anlo kal dawn a. An zingah hian lung lam natna leh cancer enkawl thiam doctor senior leh tawn hriat ngah tak te anlo tel dawn a. Cardiology lama kum 30 chuang lo thawk tawh, Dr. J S N Murthy, Senior Cardiologist & Head of Cardiology, Sri Ramachandra Medical College and Research Institute, Chennai leh Dr Ravi Kannan R, Surgical Oncologist, Director of Cachar Cancer Hospital and Research Centre (CCHRC) te an rawn tel dawn a. A tul ang medical kaihhnawih hmanrua te pawh an rawn keng nghal dawn a. Inentir zingah zai mamawh an awm anih chuan phai lama an in zai theihnan cheng nuai khat theuh mi 30 tan tanpuina an pe thei dawn bawk a ni.

Free Clinic hi Civil Hospital, Lungleiah November 10-12 chhunga neih tur a ni a. Free Clinic hi ni 3 chhung chauh awh tur anih avangin a mamawh tak tak tu mipuite an inentir ngei theihnan inentir thei tur te thlitfim lawk (screening) tum a ni a. Screening hi kalpui tan nghal a ni a. Free Clinic-a inentir duh te chuan Lunglei District chhunga hospital khawiah pawh doctor inentir tur a ni a, doctor te hian screening lo neiin Lunglei DC Office ah list hi an thawn khawm dawn a ni.

Hemi chungchang hrechiang duh chuan a hnuaia number-ah te hian zawhfiah theih a ni:

1) Dr SR Ngurchamliana, Medical Superintendent, CHL – 9436147089

2) Dr Saitluanga Sailo – 8787745589, 9862115967

3) Dr James Lalzuitluanga - 8974285506