2494/2024-2025

Champhai, 11th October 2024: Vawiin khan I&PR, Auditorium Champhaiah 'Right to Information (RTI) Week, 2024' pualin hun hman a ni a. RTI Week hi kum tin October thla tirah India ram puma hman thin a ni.

He hun hi Pu Ngulzaṭhuama, SDO (Sadar) chuan a kaihruai a. Right to Information Act chu India ram in zalenna a hmuh hnu a dan a siam ṭha ber a ngaih a nih thu a sawi a. RTI Act chu Democracy lungphum pawimawh, mipui sawrkar a din theihna tura thil pawimawh tak a nih thu sawiin Mizoramah pawh ṭangkai taka hman mek a ni, a ti a. He dan avanga politician leh sawrkar official ten fimkhurna an neih phah ringawt pawh chu hlawhtlinna ropui tak a ni, a ti.

He hunah hian Pu Lalchhuanawma Ralte, DIPRO chuan RTI Act chungchang inhrilhhriatna hun a hmang a. RTI Act ṭobul, kalhmang leh official te mawhphurhna hrang hrang a sawifiah a. Zawhna leh chhanna hun bakah RTI Act kaihhnawih sawihona neih a ni bawk.

Vawiina RTI Week puala hun hmanah hian Champhai District chhungq sawrkar pisa hotu hrang hrang te, Village Council leh tlawmngai pawl hruaitute an tel a. Pu Lalchhuanawma, Superintendent, DC Office-in lawmthu sawina hun a neiin inkhawm hi tihtawp a ni.