225/2026-2027

Champhai, dated 21st April 2026: Vawiin khan Champhai Police te'n ruihhlo cheng vaibelchhe 465 (₹465 crore) chuang hu an man chu vawiin khan Pu Mohammad Aaquib, District Bawrhsap chuan District Hospital Complex-ah a halral.

Bawrhsap Pu Mohammad Aaquib chuan thu sawiin, nikumah khan cheng vaibelchhe 117 (₹117 cr.) chuang hu ruihhlo halral a nih tawh thu leh kuminah hmasawnna ropui tak Champhai Police te'n neia cheng vaibelchhe 465 chuang lai halral a ni leh tur chu lawmawm a tih thu a sawi.

Home Minister hmalakna a Operation Jericho kalpui a ni chuan kawng tam takah awmzia a neih thu a sawi a, hun lo kal zelah heng ruihhlo te titlem zel tura chawl lova thawh zel a tul thu leh thalaite'n ruihhlo an khawih lohna tura nasa zawka zirtirna pek zel a tul thu a sawi. Champhai thalaite hian infiamna kawngah theihna sang tak an neih thu a sawi a, infiamna bakah zirna kawng leh kawng hrang hranga theihna an neihte thalaite'n an boh bo mai lohna turin thalaiten ruihhlo an khawih loh a tul thu sawiin, thalai ruihhlo khawihte chuan anmahni nun an tihchhiat bakah an chhungte thlengin an tibuai thin, a ti.

Ruihhlo bakah a tawlh ruknaa inhmahnawihte man chhuah zel kawngah tang ho zel turin kalkhawmte a chah a, khualzinte hriat tan mek Champhai hi a mawina hmu duha lo kal ten a ni lo lam an hriat lohna tura ruihhlo do kawngah theihtawp chhuah zel a tul thu a sawi a, ruihhlo hei zar man a nih theihna tura Champhai SP leh a naute thawhrimna fakawm a tih thu sawiin an kalzelna turah duhsakna a hlan a, ruihhlo hi a halral a ni.

He hun hi Pu Victor Zothansanga, Addl. SP Champhai chuan kaihruaiin ruihhlo man a nih dan kawng hrang hrang a tarlang a, ruihhlo man a nih theihna tura Police te thawhrimna leh Police te puia an tha tichak thintute chungah lawmthu a sawi a, Pu Lokeshwaran R, District SP chuan kalkhawmte lawmna thu a sawi ve bawk.

Vawiina ruihhlo halral takte hi Champhai Police te'n hmun hrang hranga an man, District Court-in halral tura phalna a pek tawh te an ni. Kum 2025, March thla atanga October 2025 chhunga man te niin ND&PS Act tlawhchhana thubuai 99 ziahluh te an ni. Hemi hun chhung hian Heroin Kg 35.852 a rit, cheng vaibelchhe 71, nuaih 70 leh sing 4 hu (₹71.70 cr), Methamphetamine Kg 490.896 a rit, cheng vaibelchhe 392 nuaih 71 sing 8 leh sang 8 hu (₹392.71 cr) leh Alprazolam Kg 4.740 a rit, cheng nuaih 94 leh sing 8 (₹94.8 lakhs) man hu a ni a, a vai hian cheng vaibelchhe 465 nuaih 36 sing 8 leh sang 8 hu man a ni.

Kum 2025 chhung khan Champhai Police te chuan ND&PS Act. tlawhchhanin thubuai 147 an ziak lut a, hemi kaihhnawihah hian mihring 260 man niin an zingah hian ramdang mi (Myanmar) 58 man tel an ni bawk. Kum 2025 chhung khan Heroin Kg 38.477, Methamphetamine Kg 622.4, Crystal Methamphetamine Kg 5.169, Caffeine Kg 3000, Alprazolam Kg 4.470 leh Corex Gram 1.6 te an man a, kum 2026 January ni 1 atanga April ni 20, 2026 chhung khan ND&PS Act. tlawhchhanin thubuai 47 an ziak kut a, mihring 76 man niin an zingah hian ramdang mi (Myanmar) 22 man tel an ni bawk. Kum 2026, January ni 1 atanga April ni 20, 2026 chhung hian Heroin Kg 8.266, Methamphetamine Kg 76.245 leh Crystal Methamphetamine Kg 10.259 te an man a ni.