226/2026-2027

Lunglei, 2026 Ṭau thla ni 21: Vawiin khan Lunglei Municipal Council (LMC) hnuaia Municipal Sanitation Committee (MSC) chu an Chairman, LMC Vice Chairman Pu K. Lalrinawma kaihhruaiin BoC Meeting Hall, Convention Centre, Lungleiah an ṭhu khawm.

Municipal Sanitation Committee Chairman Pu K. Lalrinawma chuan member kal khawmte lawmna thu sawiin, LMC huam chhunga faina kawnga hma laknaah hmasawnna a awm zel theih nan member-te chu ngaihtuahna seng turin a sawm a. Lunglei khawpui chu Swachh Survekshan 2024–2025-ah India rama faina lama hmabak nei eng berte zinga mi, "Promising Swachh Shehar of Mizoram"-ah thlan a nih thu tar langin, LMC leh mipuite thawh honain Lunglei khawpui chuan faina lamah hma a sawn zel a beisei thu a sawi.

He ṭhut khawmah hian LMC Councillor Pu Vanlalliana Pachuau bakah, LMC, UD&PA, PWD, P&E leh I&PR official-te, Local Council Association Lunglei, YMA Sub-Headquarters Lunglei, MHIP Sub-Headquarters Lunglei leh MJA Lunglei District ai awhte an tel a. LMC Chief Executive Officer (CEO) Pu Lalhmansanga chuan thu ngaihtuah tura chhawp chhuahte sawi fiahin, sawi ho zui a ni.

March ni 24, 2026-a LMC BoC ṭhu khawmin a lo rel tawh, LMC huam chhunga fai intihsiak kalpui dan tur sawi ho a ni a. LMC hnuaia local council 24 chu huang (category) hnihah ṭhenin, fai inelna hi kum tluana kalpui ni se, tih a ni a. Fai endikna tur tehfung duang turin LMC CEO, Secretary leh DUDO te ruat niin, endiktu atan Clean Lunglei te sawm ni se, tih a ni a. Fai intihsiakna pual hian LMC BoC chuan cheng nuai 5 ruahmanin, lawmman zat tur, lawmman sem hun tur, a endik hun tur leh ṭul dang chu MSC ṭhut khawm lehpeka ngaihtuah ho atan dah a ni.

LMC hotute aṭangin Lunglei khawpui chhunga bawlhhlawh khawn leh paih kalpui dan ngaihthlak niin, veng 18-in anmahnia bawlhhlawh khawn leh paih an buaipui laiin, LMC-in lirthei tira bawlhhlawh a khawnna veng paruk an la awm thu tar lan a ni a. Bawlhhlawh lak khawm leh a man khawn chungchanga ruahmanna ṭha zawk a awm theih dan tur te, bawlhhlawh khawn sa paih chungchangah a paihna hmun ruahmanah chauh paih tura fimkhur leh felfai zawka hma lak dan tur te sawi ho niin, LMC hotute'n a ṭul angin lo bawhzui se, tih a ni.

He hunah hian bawlhhlawh sawngbawlna tur, Lunglei Solid Waste Management Centre (SWMC)-I sak mek chu hman theiha peih fel thuai beisei a nih thu te, khawl pawimawh hrang hrangte chah mek a nih thu leh bawlhhlawh chhek khawm sate pawh sawngbawl mek a nih thu te tar lan a ni a. SWMC-I chu ṭangkai tak leh a nih dan tur taka hman a nih theih nan mipuite lo inbuatsaih lawk dan tur leh mipuite inzirtirna kalpui dan tur te sawi ho a ni a. SWMC-I-ah chuan bawlhhlawh ṭawih thei leh ṭawih thei lo thliar hran a, a hranga sawngbawl a nih tawh dawn thu tar lan niin, chumi atan chuan tun aṭangin mipuite'n mahni ina bawlhhlawh ṭawih thei leh ṭawih thei lo thliar hran chu lo kalpui lawk a pawimawh thu te, huan leh hmunhma remchang neite chuan bawlhhlawh ṭawih thei bik chu lei ṭha atan compost pit siama mahnia thehthang a pawimawh thu te sawi lan a ni bawk.

LMC Municipal Sanitation Committee chuan faina leh thianghlimna kawnga Lungleiin hma a sawn zel theih nan Lunglei mipuite chu mahni in leh a vel leh khawpui vawn fai kawngah te, bawlhhlawh thliar hran kawngah leh bawlhhlawh thehthang kawngah te ṭan la zel turin a ngen.