Vawiin khan SSA Mission Champhai huaihawtin Middle School zirlaiten Science leh Mathematics zirna a hma an sawn theihna tura sawrkar laipui scheme  Rastriya Avishkar Abhiyan (RAA)  kaltlangin Kahrawt Community Hall, Champhaiah Science Fair buatasaih a ni.

Hawnna inkhawm tawi buatsaihah Pu C.Lalbiakzauva SDEO & DEO Champhai chuan Mizo Zirlaite tan science leh mathematics subject-ah tan lak thar a ngaih thu a sawi a. Sawrkar laipuiin heng subject pahnihte tangkaina leh hlutna hriain  Rastriy Aishkar Abhiyan hi a duang chhuak a ni, a ti a. Zirlai ten hlauhna tel lo leh nuam ti taka zirlai an zir theih nana SSA Mission buatsaiha Science Fair siam a ni chu lawmawm a tih thu a sawi a. Zirtirtu leh Zirlaite chu Rastriya Avishkar Abhiyan programme tih hlawhtling kawnga tan la turin a chah a. Zirlaite chu Science Fair hlimawm leh hlawkthlak tak hmang tura duhsakna hlanin a duh apiangte tan Science Fair chu a hawng nghal a ni. 

He hun hi Pi K. Lalsiamliani DPC SSA Mission Champhai chuan kaihruaiin nikum lamah Science Exhibition leh Mathematics quiz hlawhtling taka neih anih tawh thu a sawi a. Zirlaite chu Fair chhunga an thil hmuhte zirchianga zawhna an neihte zawt zel turin a chah a ni. Fair hawn anih hnu hian DEO, DPC SSA leh DIPRO Champhai te chuan Fair hi an fangkual a ni. Science Fair hi zing dar 10 ah tan niin, nilenga hawn anih hnuah tlai lam dar 3 ah kharna hun neih a ni a. Science Fair a tel tithate hnenah lawmman semchhuah nghal niin,  Class V category bikah pakhatna chu Roseland M/S, pahnihna Vengthlang M/S, pathumna Venglai M/S te an ni a. Class VI category-ah Kanan M/S pakhatna niin, Vengthlang M/S leh Electric M/S ten an dawt a. Class VII category - ah Holy Cross M/S pakhatna niin, Roseland M/S leh Vengsang M/S te chuan an dawng ve leh a. Class VIII bikah pakhatna chu Venglai M/S  niin, Vengsang M/S leh Holy Cross M/S ten an dawt a. Heng bakah hian a tel zawng zawng chu consolation prize pek vek an ni. 

Science Fair hi SSA Mission hnuaia Rastriya Avishkar Abhiyan kaltlanga buatsaih niin Champhai khawpui chhunga Sawrkar Middle School leh Aided Middle school 10 te an tel a. Zirlaiten Science Fair hi an hlut hle a ni.

Attachment

  • Loading attachment...