Vawiin ni hi Statistics Day vawi 12 na a ni a, ram chhung hmun dang rualin Economics & Statistics Department Champhai buatasaihin vawiin khan he ni pual hian GM High School, Champhai Vengsangah hun hman a ni a. He hunah hian Pu Vanlalngaihsaka District Bawrhsap chu khuallian a ni.

Khuallian chuan Statistics Day chu Statistics system leh Economic planning a sulhnu chhinchhiah tlak hnutchhiahtu Prof. PC Mahalanobis piancham denchhena kum 2007 atanga hman thin a ni, a ti a. Zirlaite chu Prof PC Mahalanobis a nun atanga inzir tur leh thahnemngai taka inzira, mite aia chungchuang bik nih tum turin a fuih a. Khawtlang leh ram tana chhenfakawm leh chhawrnahawm tak ni a, sulhnu hriatrengtlak sawrkar hriatpui tham leh nakin zela mipuite hlut hnutchhiah tura tan la turin a chah a ni.

Vawiin programme hi Pu F. Lalbuaia, District Research Officer, Champhai chuan kaihhruaiin inhmelhriattirna hun a hmanga. Pi R. Laldawngliani, Inspector of Statistics-in Staistics chawilara hmasawnna tam tak thlentu Prof PC Mahalanobis a chanchin chhiarchhuahna a nei a. Resource Person Nl Lalmuanpuii Ralte hnen atangin "Quality Assurance in Official Statistics" tih thupui hmanga zirtirna ngaihthlak a ni a. Pu F. Lalbuaia, DRO in lawmthu sawiin hun hi a khar a ni.

Prof PC Mahalanobis a hian Statistics ah sulhnu ropui tak a hnutchhiah a. Ram thangmeka vangtlang nun leh economics survey dik taka kalpui anih theih nan tha a thawhhlawk em em a. Mahalanobis Distance tih leh National Sample Survey te chuan hriat a hlawhin India ramin Economic planning fel leh mumal tak a neih theihna turin a thawhhlawk hle a ni. Kum 1968 khan Padma Vibhusan chawimawina chu a lo dawng tawh a ni.

Statistics survey dik leh rintlak tak neih anih theihna turin India ram sawrkar chuan Statistics Act a siam a, data lakhawma survey neitute chu tha taka tawiawma chhanna dik leh rintlak chauh pek thin tur a ni a. Chhanna diklo leh phuahchawp petu chu a chunga dan siam hmang khian hrem theih a ni.