Kumin HSLC Exam a pass Lalruatsaka s/o Lalrengpuia, Lunglawn Veng te chhungkaw hnenah vawiin chawhnu khan NLUP Implementing Board (NIB) Chairman Pu JH Rothuama, MLA chuan Chief Minister’s Special Package kaltlangin NLUP tanpuina auto rickshaw a hlan. Vanduaithlak takin Lalruatsaka hi piantirh ata ban neilo, ban bul a ni a. Chief Minister Pu Lal Thanhawla'n May ni 24-ah Lunglei MZP ten HSLC leh HSSLC pass tharte lawmpuina an buatsaih tumin Special Award dawngtu Lalruatsaka tumruhzia leh beih nasatzia chhuanawm a tih em avangin auto rickshaw pek a nih tur thu a lo puang tawh a ni. Hlanna inkhawm Lunglei DC Office Complex-a neihah hian Lunglei DC Dr Ankita Chakravarty, IAS, NIB Secretary Pu James Lalrinchhana, NIB Media Officer Pu Andrew H. Lalremruata, Lunglei District MJA hruaitute, sawrkar official-te leh Lalruatsaka tawiawm tu mi thahnem tak an kalkhawm.

Pu JH Rothuama chuan Lalruatsaka’n HSLC Exam-ah hlawhtlinna a chang chu a lawmpui takzet thu sawiin thil ti thei tura in ngaih tlatna rilru nghet tak a nei chu ropui a tih thu a sawi a. Pianphunga rualbanlo ni mahse beidawng mai lova taima taka a beih chhoh zel avangin mi entawn tlak leh chhuanawm tak a ni tiin a kal zelna turah duhsakna a hlan a. NLUP tanpuina chu Chief Minister’s Special Package kaltlanga ruahman a nih thu sawiin kawng hrang hranga an chhungkaw eizawnna pui tu a nih a beisei thu a sawi. 

NIB Chairman chuan chhungkaw tam zawk hnena NLUP tanpuina sem chhuak turin ruahmanna siam mek zel a nih thu sawiin  NLUP chuan tanpuina dawngtute ei leh bar zawnna kawngah hmasawnna tam tak a thlen mek zel a, NLUP kalpui a nih atangin a kum telin kan economy in hma a sawn zel bakah kan per capita income dinhmun a tha chho zel a ni, a ti a. Mizoram dung leh vangah NLUP tanpuina hmanga chhungkaw dingchhuak hlawhtling tam tak hmuh tur an awm a ni tih sawiin NIB Chairman chuan tui hna siam, ram hum halh, tlangram lo neih tlakhniam kawng thlengin NLUP chuan nghawng tha tak a nei chho mek zel a ni a ti a. NLUP tanpuina a dawngtu tur dik tak ten an dawn chu sawrkarin a ngaih pawimawh hmasak ber thu a sawi a. Mizo thalaiten mahni kutkawih ngeia eizawnna ngelnghet an neih theihna turin sawrkarin theihtawpin hma a la chhunzawm zel dawn a ni, a ti bawk.

He huna thu sawitu dang Lunglei District MJA President Pu H. Lalthansanga chuan Lalruatsaka te chhungkua a lawmpui thu sawiin an chhungkua tanpui tura NLUP Implementing Board (NIB) hmalakna chu fakawm a tih thu a sawi a.  Hlawhtling tur chuan taimakna leh tumruhna neih a ngai a ni tiin Mizo thalaiten Lalruatsaka nun atangin inzirtur tam tak kan nei a ni, a ti a. Sawrkarin ngaih pawimawh tur dik tak a ngai pawimawh chu lawmawm leh thlamuan thlak a tih thu a tarlang bawk.

Lalruatsaka hian lehkha zir chhunzawm zelin tun dinhmunah Lunglei Government Higher Secondary School (GHSS) ah Class XI Arts a zir mek a ni. CM Special Package atan hian NLUP sum chu Finance Department phalnain Bank-ah a pung awma dah niin a pung atang hian mi vanduai, tanpui ngai leh eizawnna hna thawk thei lote chhawmdawlna tura ruahman a ni.  

Hlanna inkhawm neih zawh hnu hian NIB Chairman chuan tun thlaa Lunglawn leimin a chhiat tawk Pu Vanlalpeka te pafa za a tlawh a, Pu Vanlalpeka te tawrhna a tawmpui zia leh an lusunna te NLUP Implementing Board in an tawrhpui thu a sawi a. Pu Vanlalpeka pa Pu HC Aipianga chu NLUP hnuaiah vawkvulh thlang tu mi taima leh thawkrim anih thu sawilangin NLUP Implementing Board hmingin ralna a hlan a, Pu Vanlalpeka leh a faten ralna hi an dawng a ni.

Pu Zathangliana, MCS (Rtd) kum 68, Lunglei District NLUP Coordinator, tun thla ni 14 a boral ta chu a chenna in Lunglei Electric Vengah NIB Chairman hian a ral bawk.