Vawiin chawhnu khan Mizoram Science, Technology & Innovation Council (MISTIC) Governing Body chu an Chairman, Chief Minister Pu Lal Thanhawla kaihhruainain CM Cabinet Meeting Room-ah an thukhawm.

He meeting-ah hian Chief Minister Pu Lal Thanhawla chuan Mizoram Science, Technology & Innovation Council chuan tun hnaiah chak taka ke a pen thu sawiin, anni kaltlang hian Mizoramin nasa takin science & technology lamah hma a sawn mek a ni a ti. Tunlai khawvelah ram changkang apiangte hi science leh technology lama hmasawn chak ramte an ni a, hemi kawngah hian ram hnufual bik kan nih loh nan tan lak chhunzawm zel a tul a ni, a ti a. Science leh technology hmasawnna hian thu mai nilovin, hmuh theih leh hman tangkai theih a kuthnathawktute tan eizawnaah hmasawnna thlen chho zel se a duh thu sawiin Chief Minister chuan hemi kawnga sawrkar department ten pawh an harh thar chho ta zel chu lawmawm a ti a. Biodiversity a Mizoram hausakna te chu tun aia hman tangkai zawk dan ngaihtuah te, tualto ramhmul damdawi kan neih te zirchiang a, economy hmasawnna puitu tha tak a nih tur thu a sawi bawk. Chief Minister chuan state sawrkarin nasa takin hma la in, Council kaltlang hian New Economic Development Policy hnuaiah hna chi hrang hrang thawh mek a nih thu sawiin, chak taka hmasawn zel tur chuan tuina leh thahnemngaihna a pawimawh thu a sawi bawk.

Dr. R.K. Lallianthanga, Chief Scientific Officer leh Member Secretary, MISTIC chuan Sorkar kum kalta 2017-2018 chhunga MISTIC hmalakna report a pe a. Mizoram puma science lam hmasawnna leh chawilarna programme hrang hrangte a tarlang. Research leh Development project hrang hrang hna thawh mekte leh hmachhawpte sawiin - Intellectual Property Rights, khawchin zirna leh Climate Change chungchang zirbingna leh helama hma laknate a tarlang bawk. Art & Culture Mizo Department-te nen tangkawpin Mizo hnam puan chi hrang hrangte chu Geographical Indication Registry hnuaiah humhalh tumin registration buaipui mek an nih thu a sawi bawk.

He meeting-ah hian kum 2018-19 chhunga Council Annual Plan, Audit Report leh Recruitment Rules-te chu pawm a ni a, a tul ang thawktu lak belh leh siam rem ngai te siam rem tura pawm a ni bawk.

Vawiin MISTIC General Body Meeting-ah hian Pu Lalsawta, Planning Minister; Pu Arvind Ray, Chief Secretary leh member dangte an tel a ni.

Nikum chhung khan MISTIC hian science chawilarna lama a hmalakna zingah National Mathematics Day 2017 lawmna, Pachhunga University College a neih a, State Level Mathematics Competition lawmman sem te; May 2017 a National Technology Day hman te; National Science Day February 2018 a District hrang hranga hman te a tel a. Heng bakah hian state pawn a exhibition leh intihsiakna hrang hrangah Mizoram aiawhin MISTIC hi lo tel tawhin, chung zingah chuan Technology & Industry Expo, India International Science Festival 2017, STINER Walkthrough Exhibition, 16th December, 2017 a neih te, Pride of India Expo, 105th Indian Science Congress, Manipur University, Imphal a March 2018 a neih ah te a tel a ni. Tunah hian Intellectual Property Rights humhalhna kawngah MISTIC hmalakna hnuaiah Trademark paruk chu tuma chuhpui theih tawh lova tihfel tawh a ni.