Vawiin khan District Agriculture Office, Kolasib hmalakna in sub-mission on agroforestry (smaf) hnuai ah kuhva, zawngtah leh khanghu tiak sem a ni.

He hun hi Pu Lalnunhlua, MCS, Project Director DRDA chu khuallian niin hun a hman pui a, Khuallian chuan kuthnathawk kalkhawm te hma ah thu sawiin Sawrkar in hmalakna hrang hrang a nei thin a, scheme tam tak hlawhtlinna hi chu tanpuina dawngtu te kutah a innghat a, rinawmna leh taimakna nen chuan engkawng pawh hi zawh ila hlawhtlinna a awm chawk thin ani a ti. Sawrkar atanga tanpuina dawn chungchangah Rinawmna a pawimawh thu sawiin, "Hotu lian te hmelhriat that vang emaw sawipuitu nei that avang ringawtin tanpuina hi dawn tum lo ila" hma la tur tak tak te chu duhsak an phu ani a ti a tanpuina dawn chungchangah mizote kan in bihchian a hun tawh a ni a tiin rinawm taka hmalak tum mang silova Sawipuitu neihthat avanga tanpuina dawn phet tum hi sim a hun tawh ani a ti bawk.

Khuallian chuan SMAF hnuaia kuhva, khanghu leh Zawngtah tiak sem theih a a awm chu lawmawm a tih thu sawiin hengte hi sum chang thlai a nih mai bakah thing leh mau te hian boruak thianghlim an pek chhuah thu sawiin Kan ramngaw te siamtha turin keimahni bak midang an awm lo a ni tiin thingphun kan uar deuh deuh a kan tu leh fate tan he khawvel hi chenna tlaka kan hnutchhiah a ngai a ni a ti bawk. Pu Lalnunhlua chuan he huna kalkhawm kuthnthawkte chu rinawm leh taima taka thawk turin a chah a, hlawhtlinpui ngei turin duhsakna a hlan bawk a ni.

Sub-mission on agroforestry (smaf) hi National Mission for Sustainable Agriculture (NMSA) hnuaia sub-scheme niin he scheme ina a tum ber chu tunlaia kan buaipui em em climate change karah kan loneituten an huan/ram vah sa, hmun awl engmah an chinlohna hmunah heng thing tangkai boruak tha petu chin tir a ni a. Hemi hmang hian loneitute pawhin sum lakluh belh (additional income) an nei thei dawn ani.

Vawiin ah hian Kolasib District huam chhunga Zau thlan bik  pasarih(7), heng Dumlui zau, Dumluilian Zau, Tuichhuahen, Darnam zau, thinglian zau, thingdawl leh Tialte zau te hnenah  Zawngtah (tiak 5610), Kuhva (tiak 20,000) leh khanghu (tiak 820) semchhuah a ni.

He hun hi Kolasib DAO Pu J.Rothanga, MAS in a kaihruaia, District Agriculture Office Kolasib Officer leh Staff te bakah Kolasib KVK Senior Scientist Dr. Michelle ten hun an hmanpui bawk ani.