4118/2023-2024
Champhai, the 11th March, 2024: General Election to Lok Sabha 2024 neih tura inpuahchahna kalpui mek zelah vawiin chawhnu dar 1:00 khan Champhai District Bawrhsap Pu James Lalrinchhana, District Election Officer hovin Service Provider-te DC Conference Hall-ah meeting neihpui an ni.
He hun kaihruaitu District Election Officer Pu James Lalrinchhana chuan Lok Sabha inthlanpui hun tur puan thuai rin a nih thu sawiin, inthlanna felfai leh chak neih a nih theih nan inbiakpawhna chak leh tha neih a tul a ni, a ti a. Champhai District chhunga service provider-te chu harsatna an tawhte a hnena thlen hreh lo turin a chah a, inthlanna neih huna an pawimawhzia hriaa signal tha zawk a awm theih nana theihtawp chhuah turin a chah a. Champhai North Assembly Constituency huamchhunga awm Khawzawl District chhunga khaw 6 ahte pawh inthlan huna signal tha a awm reng theih nan theihtawp chhuah turin a chah nghal bawk.
Thusawitu dang Pu Lalrinawma, PD, DRDO, Nodal Officer (Expenditure Monitoring Cell) chuan inthlan hmaa mobile service provider-te nena inrawnkhawmna neih chu thil tihmakmawh a nih thu sawiin, sector officer, polling party leh election kaihhnawiha duty te'n report an pek zung zung theihna turin mobile signal tha tak neih a tul thu a sawi a. Signal awm that lohna shadow area-te ngaihpawimawh bik a tul thu leh signal neih dante inhrilhhriat lawk a pawimawh thu a sawi bawk.
He huna tarlan a nih dan chuan Khawbung, Melbuk leh Champhaiah te BSNL Tower 2G pe chhuak awmin hengte hi tun dinhmunah chuan internet khawih nan a hman theih loh a. Airtel bikah chuan district chhungah tower 63 awm mekin heng zinga 2 te hi agreement a tawp tawh avangin thiah tur a ni a. A tlangpuiin District chhung khaw hrang hrangah mobile signal a awm tha a, Polling Station 84 te pawh biakpawh theih an ni vek a, tower awm lohna khuaahte pawh a hnaivai khua atangin signal kah chhuah a nih thu tarlan a ni.
Meeting-ah hian election kaihhnawih application hrang hrangte online kaltlanga buaipuina ENCORE Software chungchang leh hemi chhawr tangkai tura mobile connectivity, a bik takin internet connectivity pawimawh dante sawiho a ni a. Vote thlak dawn hnaia harsatna tawh loh nana power supply tha leh back-up tha neih a tul dante pawh sawiho niin, service provider-te chu tower an neihna hmun leh signal-in a tuamchinte bakah signal an pek chhuah chak dante kimchang taka thehlut tura tih an ni bawk.

Attachment

  • Loading attachment...