4117/2023-2024

Aizawl, 11th March 2024 : Vawiin khan Social Welfare, Tribal Affairs & Women & Child Development Minister Pi Lalrinpuii chuan Aijal Club Park-ah Poshan Pakhwada 2024 a hawng. He hun hi Social Welfare, Tribal Affairs & Women & Child Development Department Joint Secretary Pi Zonunthari’n a kaihruai a, Director cum Nodal Officer ‘Poshan Bhi Padhai Bhi’ Women & Child Development Pi Zoramthangi Chhangte pawhin thu a sawi.

POSHAN Pakhwada (Nutrition Fortnight) hawngtu, khuallian ni bawk Pi Lalrinpuii chuan Mission Saksham Anganwadi & POSHAN 2.0 hnuaiah naupang kum thum atanga kum ruk inkarte Anganwadi Centre-a an nun bul tan nana thiam thil pawimawh zirtir leh nu naupai, nau pawm, naupang piang tir atanga kum ruk (6 yrs) hnuai lam leh tleirawl ten an kum mil a zir a inkhaidiat taka chaw tha khamkhawp an dawn theih nan leh chaw tha kham khawp an dawn loh avanga natna chi hrang hrang (thanthu, cher lutuk leh zang lutuk) um bo tum a nih thu a sawi a. Nu naupai leh naupawm laite bakah hmeichhe tleirawlten chaw tha hmuh mumal loh vanga harsatna an tawh theih thisen tlakchhamna (Anaemia) laka venhim tum a nih bawk thu sawiin, nutrition fortnight hi Mizoram chhunga district khawpui zawng zawngah leh ICDS block zawng zawngah activity calendar behchhana hman a nih tur thu a sawi a ni.

Khuallian hian raipuarte tan inenkawl uluk a pawimawh thu sawilangin, nu a rai atanga naupang kum 2 a lo tlin thleng hi ‘1000 Days Window of Opportunity’ tih a ni a, hemi hun chhung hi naupangte thluak a than nasat lai ber niin, an puitlin hnua an pianphung tur leh an hmalam huna an hlawhtlin thlenga hriltu a ni a ti a, hemi avang hian nu a rai atanga naupang kum 2 an lo tlin thleng hi enkawlna uluk leh tha an mamawh ber lai leh enkawlna tha kan pek a ngaih nasat ber lai a ni a ti. He hun hmang tura kalkhawmte chu Mizorama chaw tha khamkhawp ei tur hmuh loh avanga natna leh taksa chak lohna hrang hrang, nu leh naupanga thleng thinte um bo zel turin leh hnam hrisel leh pian tha kan lo nih chhoh zel theih nan theihtawp chhuah a, mi nawlpui hrilh hretu leh zirtirna petu ni tura hma la turin a sawm nghal bawk a ni.

Director cum Nodal Officer ‘Poshan Bhi Padhai Bhi’ Women & Child Development Pi Zoramthangi Chhangte chuan Poshan Bhi Padhai Bhi tih awmzia chu ‘Ei tha pe la, zirtirna pe bawk rawh’ tihna a ni tih sawiin, Early Childhood Care and Education Programme a ni a, Ministry of Women and Child Development hnuaia Saksham Aganwadi and Poshan 2.0 hmalakna thar a ni a ti a, he hmalaknain a thil tum langsar zualte a sawi zau bawk.

State Nodal Officer Saksham Anganwadi & POSHAN 2.0 Women & Child Development, Pi Sailopari chuan Poshan Pakhwada 2024 activity presentation a nei bawk a ni.

POSHAN Pakhwada (Nutrition Fortnight) hi Kum 2018-a POSHAN Abhiyaan a lo pian atang khan kum tin March thlaah thupui hrang hrang neiin hman thin a ni a, kuminah pawh hian thupui hrang hrang a hnuaia tarlante hmang hian beihpui thlak a ni ang -

1) Poshan Bhi Padhai Bhi (Education along with Nutrition) - Naupang ten chaw tha kham khawp an dawng chunga nun bul tan nan a thiam thil pawimawh zirtir.

2) Tribal, Traditional, Regional & Local Dietary Practices focused Sensitisation around Nutrition - Kan ei leh in chin dan thante hrisel zawka kan hman theih nan a her rem.

3) Health of Pregnant Women and Infant & Young Child Feeding (IYCF) Practices - Nu naupaite hriselna ngaih pawimawh leh naupang ten an kum mil a zira inkhaidiat taka chaw tha khamkhawp an dawn theih nan an ei leh in tur pek dan.

Poshan Pakhwada 2024-ah hian Department of Ayush chuan Yoga demonstration neiin, Consultant POSHAN 2.0 Pi R. Lalrinkimi‘n lawmthu sawina hun a hmang a ni. Stall chi hrang hrang hawn a ni a, Mizoram Sawrkara Department hrang hrang leh College zirlaite an tel bawk a, zaithiamte zaiin, hun hlimawm tak an hmangho a ni.