4241/2023-2024

Champhai, the 19th March, 2024: Nasha Mukh Bharat Abhiyan (NMBA) hnuaiah Mizoram Social Defence & Rehabilitation Board (MSD&RB) buatsaihin vawiin chawhma dar 10:00 atang khan ni hnih awh tur ruihhlo ngaite enkawlna home hrang hranga thawkte tan '2 Days Training Programme on Substance Abuse Prevention for Service Providers' tih chu I&PR Conference Hall-ah neih a ni.

Khuallian ni a he hun hmanpuitu District Bawrhsap Pu James Lalrinchhana, Chairman, District Level Nasha Mukh Bharat Abhiyan, Champhai District chuan drugs hman sual leh hemi avanga harsatna thlengte chu nitina buaipui ngai a nih tawh tak meuh thu sawiin, damdawi tawlhna kalkawng Champhai District-ah damdawi a hluar thu leh khawtlangah nghawng ṭhalo tak a neih thu a sawi a. Ruihhlo ngai leh hemi avanga buaina tawkte hmangaih taka enkawltu home hrang hranga thawktute inpekna fakawm a tih thu a sawi a. Mawhphurhna sang tak nei an ni tih inhriaa an hnena tlulut ruihhlo avanga harsatna tawkte awmze nei taka an enkawl theih nan training chu chhawr ṭangkai tum turin a chah a ni.

Ruihhlo ngaite enkawl leh chhanchhuah kawngah tanrual a pawimawh takzet thu sawiin, ruihhlo do leh ngawlvei enkawl chu tu emaw kuta dah bik mai lova kan zavaia hmalakna tur a ni, a ti a. Training tura kalkhawmte chu mithiam zawkte zirtirna ngaipawimawha hriat duh an neihte pawh zawh hreh lo turin a fuih a. Midang tana malsawmna nih tum tlat tura fuihin, thiamna leh hriatna zau zawk neih belh nana training hmang turin duhsakna a hlan a ni.

He hun hi Member Secretary, Nasha Mukt Bharat Abhiyaan (NMBA), Champhai District Pi PB Liansangpuii, Coordinator, Mizoram Social Defence & Rehabilitation Board (MSD&RB), Social Welfare & Tribal Affairs Department chuan a kaihruai a. Resource person tura ruat Pu Benjamin Laltanpuia, Documentation Officer, SLCA leh Pu Lalrindika, Facilitator, SLCA te'n training-ah hian topic hrang hrang hmangin zirtirna an pe a. NMBA hmalakna hnuaiah Aizawl leh Champhai District-te chu India rama tiṭha berte zinga mi an nih thu an tarlang a. District Bawrhsap kutah 'Drugs & Children' tih survey report an hlan nghal bawk.

Attachment

  • Loading attachment...