4242/2023-2024

Champhai, the 19th March, 2024: Lok Sabha inthlanpui neih tur atana inpuahchahna kalpui mek zelah vawiin chawhma dar 11:00 khan District Election Officer, Champhai District Pu James Lalrinchhana hovin DC Conference Hall-ah Law Enforcement Agency hrang hrangte chuan dan leh thupek kenkawh chungchang ngaihtuahin meeting an nei.

District Election Officer Pu James Lalrinchhana chuan inthlanna puan fel a nih tawh avangin ramri depa awm Champhai District-ah enforcement agency-te ngawrh lehzuala tanlak a tul thu sawiin, inthlanna muanawm, felfai leh langtlang a awm theih nana ṭanlak a ṭul thu a sawi a. Vote zawn nana hman theih hrang hrangte man zel a ngaih thu a sawi a. Ramri dep hmun pawimawh taka awm Champhai District-a hmalaknate chu Election Commission of India-in a ngaihven reng thu sawiin, inthlahdah theih a ni lova, engtiklai pawhin kan inralrin reng a ṭul a ni, a ti a. Law Enforcement Agency-te chu report mumal tak siama a ṭul huna enlet theih tur buatsaih turin a chah a. Inthlanna muanawm, felfai leh langtlang siam kawnga mawhphurhna pawimawh tak nei an ni tih inhriaa theihtawp chhuah chhunzawm zel turin a chah nghal bawk.

SP Champhai Pu Vineet Kumar chuan inthlan laiin damdawi, sum, dan lova bungraw tawlh ven leh man kawngah theihtawp chhuah tlan a pawimawh thu a sawi a. Inthlan hun chu thal chho lai, awlsam taka ramri kan theih hunlai a nih avangin ramri kaltlanga bungraw lakluhte uluk taka enfiah zel a ṭul thu a sawi a. Security tha tak kalpui turin State Police bakah CAPF te nena hmalak tlan a nih thu sawiin, enforcement agency dangte nena ṭanho thiam a pawimawh dawn thu a sawi bawk.

He hunah hian Police, Assam Rifles, Taxation, Excise & Narcotics, Environment, Forest & Climate Change, Transport, SIB, Legal Metrology, leh Custom hotute'n report an pe a. Daily seizure report pek bakah election hun chhunga dan lova thil tawlh ruk man lian tham (major seizure), cheng vaibelchhe 1 hu aia tam sum, zu, damdawi, lunghlu, rangkachak, vote zawn nana a thlawna thil sem tur leh adang mante report dan tur sawiho a ni.

Attachment

  • Loading attachment...