4243/2023-2024

Hnahthial the 19th March 2024: District Election Officer Pu Chuauhnuna kaihhruaiin vawiin khan DC Meeting Hall, Rallang tlang, Hnahthial-ah NGO hruaitute leh chanchinthar thehdarhtute an thukhawm a, kan hma lawka Lok Sabha MP inthlan lo thleng tur chungchangah tul leh pawimawhte an sawiho.

Vawiin meeting-ah hian Lok Sabha MP inthlan lo thleng tura South Tuipui bial inpuahchahnate leh hmalaknate thlirho a ni a, hmabak awmte sawiho niin theihtawp chhuah a tul thu tarlan a ni. District Bawrhsap Pu Chuauhnuna chuan vawiin thutkhawm chhan sawiin inthlan lo thleng tura mipui ten awlsam zawk leh felfai zawka an voter serial number an hriat zung zung theihna tura ECI in a duan Voter Assistant Booth chungchang sawiho a ni, a ti a. BLO ten an bial chhung theuhah Voter Information slip sem thin mahse hmaih palh awm thei a nih avanga he booth hi a tangkai hle dawna a hriat thu a sawi bawk. Kalkhawmte chuan ngaituahna seng hovin inthlanna thianghlim leh felfai a awm theih nan BLO te bakah District Election Office leh Hnahthial District NGO Coordination Committee tangkawpin Voter Assistant Booth siam ngei ni se an ti a, Hnahthial NGO Coordination Committee te chu booth vil tura mawhphurhna pek ni se tiin khawpui chhungah YMA Sub Hqrts, khawpui pawnah YMA branch tin te chu a hnarkaitu ah ruat ni se tih a ni bawk.

Election Officer Pu Lalbiakfela pawhin he hunah hian thu sawiin NGO hruaitute chu an tawiawmna  a ngen a, Voter Assistant Booth din chhan chu mipui vote thlak tur ten awlsam taka an serial number an hriat theihna tur a nih rualin NGO hruaitute chu khawtlanga zah kai tak tak te an ni a, boruak muanawm tak hnuaia inthlan buatsaih a nih theih nan a ni tiin tlawmngai taka tawiawm leh theuh turin a sawm bawk.