4244/2023-2024

Dated Serchhip, the 19th March, 2024: Lok Sabha Inthlanpui 2024 atana inbuatsaihna kal zelah vawiin khan Serchhip District Election Officer Pu David Lalthanluanga, Serchhip DC ni bawk chuan Serchhip District chhunga Department tin Head of Office te ko khawmin Serchhip DC Meeting Hall inthlanna kaihhnawih thu pawimawh a sawipui.

Pu David Lalthantluanga chuan Department tin hotute chu inthlanah mawhphurhna pawimawh tak tak chelhtute an ni a, a hming hmerha ruat ni lo te pawh inthlan kaihhnawihah chuan sawrkar hnathawk zawng zawng te an pawimawh vek tih sawiin inthlanna fel leh fai a awm theihna turin an hma zawna tih tur awm te tha taka hlen chhuak turin a chah a ni.

Vawiin meeting-ah hian Inthlanna neih a nih chhunga pawimawh tur inkalpawhna kawng, tui leh power supply, phone leh internet connectivity, inthlana duty tur manpower chungchang te leh Polling Station tina mamawh te a awm kim leh kim loh sawiho a ni a. Department aiawh te hnen atangin report ngaihthlak niin an hnathawh tawh chin leh hmabak te sawiho a ni.

Serchhip District chhungah hian Polling Station 88 a awm a. Election Commission of India duhdan angin heng polling station zawng zawngah hian mipui nawlpui bakah rualbanlo (Person with Disabilities) ten awlsam leh nuamsa zawka vote an thlak theihna tur atan Assured Minimum Facility siam vek a ni dawn a. Hei hian kawlphetha, tui in tur, inthiarna (toilet), ramp, furniture, approach road, mobile connectivity leh telephone (landline) leh a dangte a huam a ni. Sectoral Officer ten Polling Station zawng zawng fang chhuak turin an zin kual mek a. Anni hian Polling Station zawng zawng hi chipchiar takin an zir chiang ang a. Assured Minimum Facility awm kim lohna Polling Station hi thuam chak leh chei that an ni dawn a ni.

Vawiin meeting ah hian Serchhip SP Pu MS Dawngkima bakah Serchhip District chhunga Department tin Head of Office te leh telephone leh internet service provider te an tel a ni.