Vawiin chawhnu khan Sawrkar laipui scheme Shyama Prasad Mukherji Rurban Mission (SPMRM) chungchanga inrawnkhawmna chu DC Conference Hall, Keifangtlang, Champhaiah neih a ni a. Dr Naveen Agarwal , DC Champhai leh Chairman District Level Empowerment Committee ni bawk chuan he hun hi a kaihruai a. He Mission hmang hian thingtlang khaw inhnaih te te Cluster Village a lakhawmin tihchangtlunga chei that tum a ni.

State Level Empowerment Committee (SLEC), Chief Secretary hova thukhawmin a lo rel tawh bawhzuiin RURBAN Phase III hnuaiah hian Champhai District atangin Khawzawl RD Block hnuaia Cluster chu telh a ni dawn a. Cluster hian Khawzawl khaw chhehvela thingtlang khua 13; Arro, Chawngtlai, Chhawrtui, Hmuncheng, Kawlkulh, Khualen, Neihdawn, Ngaizawl, Puilo,Tualpui, Tualte, Tuipui leh Vankal te chu a huam dawn a. Vawiin hian Integrated Cluster Action Plan (ICAP) te zirchian niin, zau taka line department aiawhte nena sawihona hun hman a ni. 

SPMRM-ah hian Rural Development Department chu State Nodal Agency a ni a. State Technical Support Agency (STSA) atan Catalyst Solution, Chaltlang thlan niin, an ni lam hian Cluster khaw hrang hrangte tlawhchhuakin hmalakna tur leh zirchianna an neihte an tarlang a. Pu Stanis T.Tuikha, State Programme Manager, RURBAN chuan presentation pein scheme awmze tlangpui a sawi a. He Scheme hnuaia hnathawh turahte hian MLA fund, NEDP leh Department thenkhatte nena sum inthawhtawma convergence a kalpui angaih dawn avangin inrawnkhawmna neih a ni.

RURBAN Phase III ICAP hmanga hmalakna turah hian Champhai District chhunga Khawzawl RD Block hnuaia khaw 13 a chhungkaw 2233, mihring 10682 te chu a huam dawn a. Heng khuaahte hian cheng Vaibelchhe 50 sengin  hmasawnna ruhrel hrang hrangte thawh tur niin, Economic Thrust, Basic Amenities leh Social Amenities huangahte changkanna lam pan tura hmalak tum a ni.

He Mission hi thingtlang khuate cheithat tumna Provision of Urban Amenities to Rural Areas (PURA) behchhana siam a ni a, India ram pumah Cluster 300 a hmalak tur a tih niin, Ministry of Rural Development-in tehfung hrang hrang a siam zulzuia thlan a ni a. Mizoramah he Mission hi Aibawk leh Thingsulthliah RD Block-ah kalpui mek a ni a, Phase III hmang hian Khawzawl leh E.Lungdar RD Block hnuaia Cluster-ah te hmalak tum a ni.

Meeting-ah hian Pi Ethel Rothangpuii, PD DRDA Champhai, Member Secretary; Pu Lalremruata Sailo, BDO Khawzawl; Line Department aiawhte leh Catalyst Solution aiawhte  an tel a ni.