Nimin chawhnu khan Assembly House Conference Hall ah “My NEDP, My Project” (Mipui Mamawh Intawm Ruahmanna) hnuaia inelna neiha Mizoram district tin atanga Project thlan chhuahte tan “Interactive Session on Investment and Development” buatsaih a ni a, Planning Minister Pu Lalsawta chu Khuallian niin Khual zahawm ah Pu H Liansailova, Vice Chairman, MSPB a ni bawk.

Planning Minister Pu Lalsawta chuan MiMIR in mipui thinlungah rah tha tak a neih chu hmasawnna kawnga phurna nasa tak rawn lang chhuak hi a ni, a ti a, Project tha tak tak in rawn phochhuah ah ngelnghehna leh entawntlak nih tumna in dah hmasakna hi a ropui hle a ni, a ti bawk. Pu Lalsawta chuan Project tha thlanchhuah ten mahni veng leh khua mai bakah thenawm khua te hmasawnna tur kep in tum zelna hi in chhuanawm hle a ni, a ti a, kan ram leilung mawina leh ramngaw leh nungchate humhalh a, zin mi tam zawk hip thei tur khawp a rilru in senna azarah Project tha tak tak in duang hi a lawmawm hle a ni, a ti. Planning Minister chuan heng hmachhawp hrang hrangte ti hlawhtling tur hian tumruhna nen a hmalak a nih a hlawhtlinna an hmuh ngei theihna turin duhsakna a hlan bawk.

Pu H Liansailova, Vice Chairman MSPB chuan Mizoram sawrkarin NEDP a duang hi kan vanneih phah hle a ni, a ti a, mitin huap, tu pawh tel theihna a nih avangin thangthar ngaihtuahna thar neiten NEDP kaltlangin hmasawnna kawng hrang hrang an zawh mek zel hi a lawmawm hle a ni, a ti bawk. 

MiMIR hi Mizoram mipuite ngeiin District tin a khaw pakhat theuh nasa taka alo changkan theih nan hmasawnna project an duan theih na turin ruahman a ni a. He project hnuaiah hian district tin a project tha ber pakhat tan Rs 1 Crore hman tura ruahman a ni. Local/Village council ten tlawmngai pawl te nena Joint Committee dinin an veng/khua a mipuite mamawh intawm leh mipui harsatna sukiang thei “community assets” emaw khua mipuite tan eizawnna ngelnghet siam theihna tur project duangin an thehlut a, a vaiin project 329 a lut a ni. Deputy Commissioner theuh ten an district a MiMIR committee dinin inelna thianghlim leh langtlang tak hmangin project tha ber an thlang chhuak a ni. Aizawl district ah “Sialsuk Eco-tourism Development Innovation Project”, Champhai district atangin New Chalrang project “NCR Organic Pineapple Processing Plant”, Kolasib district ah Khamrang project “150Kw Power Grid Connected Solar Plant”, Mamit district atangin Reiek project “Organic and Eco-Tourism Facilitation centre”, Lawngtlai district atangin Sangau “Phawngpui tourism development project”, Lunglei district ah Cherhlun “50 Kw Solar power plant project”, Serchhip district ah Thenzawl project “Loom Upgradation and product diversification” leh Siaha district atangin New Siaha West project “Integrated Mass transit terminal” te thlan chhuah anni.

Heng project thlan chhuah te hi power point presentation hmangin zir hona hun hman a ni a, project hrang hrang duangtute leh Investor/entrepreneur sawm bik ten inkawmna hun an nei nghal bawk.