Vawiin chhun dar 12 khan I&PR Conference Hall-ah PHE Department-in tui sem hun tur SMS hmanga mipuite hriattirna tura an buatsaih 'SMS Blast' chu Champhai District Bawrhsap Pu Vanlalngaihsaka, IAS chuan a hawng a. He hunah hia District Head of Office-te leh pawl hrang hrang aiawhte an tel a ni.

SMS Blast hawn paha thu sawiin District Bawrhsap Pu Vanlalngaihsaka, IAS chuan tunlai thiamna hmanga PHE Department-in mipuite hnena tui sem hun tur leh harsatna a awm chang pawha harsatnate mipui hnena SMS hmanga hriattir zung zung theihna tura SMS Blast hman theiha a peih ta chu lawmawm a tih thu sawiin, "Mipuiten hun leh tha tam tak an sen thlawn thin na kha sutkian a ni dawn ta a ni," a ti a. PWD leh P&E Department-te pawh tunlai thiamna hmanga mipuite chhawmdawl dan zawng zel turin a chah bawk.

SMS Blast hawnna programme hi SE (PHED) Pu Lalrammawia'n a kaihruai a, SDO (PHED) Pu V. Laldanmawia chuan SMS Blast kalphung a sawifiah thung. Mipui leh tlawmngaipawl aiawh kalkhawmten an hriat thiamlohte an zawh bakah PHED hmalaknain mipuite a chhawk zangkhai dawn avangin lawmthu an sawi bawk. SMS Blast hawnna inkhawm hi EE (PHED) Pu K. Zohmingliana'n lawmthu sawiin a khar a ni.

Champhaia PHE tui connection nei 3,742 te hnenah tui semna tur leh a sem hun tur hriattir nan SMS a hlawma thawn chhuah thin a ni ang a. Engemaw harsatna avanga tui sem a khaihlak dawn pawhin mipuite hriattirna SMS thawn thin a ni ang. SMS hlawm thawnna tur hi ICT Department-in India sawrkar E-governance programme hnuaia an buatsaih niin mipuiten a thlawnin hriattirna an dawng thin dawn a ni. SMS hmanga tui sem hun tur hriattirna hi Aizawl leh Lunglei khawpuiahte hman tawh niin Champhai hi a pathumna a ni.