Sports & Youth Services Minister Pu Zodintluanga chuan vawiin chhun dar 12:00 khan Rs. 175,55,000/- senga sak Mizoram Taekwondo & Powerlifting Hall, Republic Vengthlang ami chu a hawng a, Pu Hmingdailova Khiangte, Parliamentary Secretary for SYS etc. leh bialtu MLA Pu R.Vanlalvena te'n he hun hi an hman pui bawk a ni.

 

Hawnna thu sawiin Pu Zodintluanga chuan thalaite hi kan ram leh hnam enkawltu turte an la ni tih hria in Sawrkarin an hmasawnna tur kawng chi hrang hrang a ngaihtuah a, chung zingah chuan thalai infiammiten an tuina zawng ngei a an kal a an hlawhtlinna tur chuan hmunhma tha leh hmanraw tha an mamawh tih hi a ngaihpawimawh ber pakhat niin vawilehkhatah a zavaia tih theih nilo mahse a tahtawlin theihtawp a chhuah a Football khelmual tha nei turin phullem hmun hrang hrangah phah ani tawh a, tunah hian Serchhip leh Kolasib a phah turin chak taka hma lak niin Saitual leh Hnahthialah pawh phah tum ani bawk a, Boxing Hall tha tak tak sak zawh tawh niin sak lai mek te pawh a awm a, vawiina Taekwondo and Powerlifting Hall hawn anih bakah naktip lawkah Zemabawk-ah Judo Hall pawh hawn ani dawn a, Lungleiah Contact Sports Centre changtlung tak sak mek ani bawk a, hei bakah hian sports discipline hrang hrang tan hmunhma leh hmanraw tha tak tak siam anih bakah siam mek te, siam leh tur ruahmanna te thahnemtak a la awm a, tuna kan neih sa atang ringawt pawh hian thalaite ah malsawmna leh hmasawnna tam tak hmuh tur a awm tawh a ni a ti a, heng zawng zawngte hi thalaiten an hman tangkai atan Sawrkar chuan a ti a, Taekwondo and Powerlifting Hall thar pawh reilote ah tun aia thahnemzawk Mizoram tan chawimawina hlawh chhuak tu a nih ngei a beisei thu a sawi bawk. Taksa hriselna enkawl that a pawimawh thu sawiin ei leh in thlenga fimkhur tur leh ruihtheih thil laka fihlim tura chahin nungchang mawi tak pu turin thalai infimmite a fuih a, Hall thar chu Zofate hmingchherna anih a kan ram leh hnam hmingthatna tizual zel tu ni turin duhsakna a hlan a ni.

 

Khualzahawm Pu Hmingdailova Khiangte, Parliamentary Secretary pawhin Mizoram Amateur Taekwondo Association chu Mizoram leh India ram tihmingthatu an ni a ti a, Powerlifting Association pawh pawl naupang te mah nise thalaite tan belh tlak Mizoram tihmingthatu an ni a ti bawk. Sawrkarin thalaite tuihalna hrechiangin an mamawh te a tawk te in a phuhru chho zel a, hei hi thalaite pawhin an hriatthiam a tha taka an dawn sawn a pawimawh a, hlawkpui ngei tura tumruhna leh tawrhchhelna nen ke an pen a pawimawh a, Sawrkar thahnemngaihna chu a taka hlawk zawk a chhanglet turin rilru tih paukhauh a ngai ani a ti bawk.

 

Mizoram Taekwondo and Powerlifting Hall hi School Education Department in Govt. Middle School Republic Vengthlang ram an sahthlak ah sak a ni a, Hall sakna tur atan hian Mizoram Sawrkarin kum 2013-2014 ah Special Plan Assistance (SPA)  atangin Rs. 175,55,000/- pe in Hall sak hna hi Pu F.Sangkhuma Venghlui in a thawk a ni. Hall hi August ni 1, 2014 a sak tan niin January ni 8, 2016 ah sak zawh a ni a, He Indoor Hall hi chhawng hnih a sak niin a dung metre 28, a vang metre 16.50 a zau a ni. Chhawng hnuai zawk hi Mizoram Powerlifting Hall atan hman tur niin hetah hian inthiarna (toilet) pali leh inthlakna pindan (changing room) pahnih a awm a, playing area square metre 240 a zau a awm bawk a ni. Chhawng chung zawk hi Mizoram Taekwondo Hall atana ruahman a ni thung a, hetah hian inthiarna (toilet) pali leh inbualna pindan leh inthlakna pindan inkawp (bathroom-cum-changing room) pahnih a awm a, playing area square metre 365 a zau a awm thung a ni.