804/2022-2023
Champhai, the 7th June, 2022: District SEDP Committee bultumin vawiin khan Champhai District chhunga Assembly Constituency pathum; 23-Champhai North, 24-Champhai South leh 25-East Tuipui huamchhunga khua leh veng 68 a Village Level SEDP Committee Chairman leh Member Secretary-te tan Sawrkar flagship programme Socio-Economic Development Policy (SEDP) chungchang inhrilhhriatna leh inzirtirna hun Kahrawt Community Hall-ah buatsaih a ni.

He hun hmanpuitu District Bawrhsap Pu James Lalrinchhana, Chairman, Champhai District SEDP Committee chuan rilru put dan leh sukthlek danah District dangte umtu ni lova a hmahruaitu nih tum fo tura tanlak a ngaih thu sawiin, SEDP hlawhtling taka kalpui turin official leh mawhphurhna nei Sawrkarin a ruatte an pawimawh dawn thu leh inpawhtlang taka thawhho a tul thu a sawi a. Training chu inzirtirna mai bakah Department Official-te nena inpawhtlannna leh inhmelhriatna pawimawh tak a ni a, mahni veng leh khuaah SEDP chungchang hre ber tura sawrkarin a rin leh ruat Village Level SEDP Committee member-te chu an mawhphurhnate tha taka hlen a, khaw aiawh an nih avangin taima lehzuala tan la turin a chah a ni.

Champhai District SEDP Committee Chairman chuan Sawrkarin a enkawl mipuite hamthatna turin theihtawp a chhuah thin thu sawiin, SEDP hlawhtlin tak takna tur chu mipuiah a innghat a, sawrkarin a ngaipawimawhin a la thutak hle a, kan chunga rinna a nghah tipuitling turin theihtawp kan chhuah tlan a ngai a ni, a ti a. Kalkhawmte chu midangte tana malsawmna thlentu ni thei tura ngaihtuahna seng tura chahin, dinhmun tha leh thlamuang zawka mipuite an awm theih nana pawimawh tak an ni tih inhria a thahnemngai taka thawk turin a chah a. SEDP kaihhnawih peng hrang hrangte inkarah thawhhona leh inpawhtlanna tha zawk a awm a ngaih thu leh mahni khua leh veng theuhah a tha lam hawia thil inthlakthleng a awm theih nana tanlak a tul thu a sawi bawk a. Zawh duh leh hriatfiah duh neite inthlahrung hauh lova zawt turin a sawm a, training hlawhthlak tak nei tura duhsakna hlanin a hawng a ni.

Addl. DC Pu Henry C. Lalrawnkima chuan SEDP bihchianna leh kalpui dan turte a sawifiah a. SEDP chu February ni 25, 2019 ah Sawrkar flagship programme atana puan a nih thu leh hemi hnuaiah hian board 14 din a nih thu a sawi a. Chhungkaw bil leh kaihhnawih zawnga kalpui a nih thu leh, ruahman danin Assembly Constituency tinah chhungkua 1500 theuh thlanga kalpui tum a nih thu a tarlang a. Eizawnna ngelnghet neih theih nana duan a nih thu pawh sawiin, Department-te tan mipui kaihruai thei tura tanlak a ngaih thu leh, mipui pawhin kaihhruai tlak leh tanpui chakawm ni tura tan an lak a ngaih thu a sawi bawk.

He hun hi Pu Lalnunfela Chawngthu, SDO Sadar, Nodal Officer, SEDP Champhai District chuan kaihruaiin kalkhawmte lawmna thu a sawi a. Village Level SEDP Committee-te hriat tur leh SEDP hnuaia hmalak dan tur hun bituk ruat a sawifiah bawk a. Hemi hnu hian Department chanpual sawizauna Line Department hotute hnen atangin ngaihthlak a ni a. Vety Department chungchang Dr. B.Lallawmsanga, DAH&VO; Agriculture Department chungchang Pu H.Lalkima, BAO; Horticulture Department chungchang Pu K. Zonunsanga, ADHO; Sericulture Department chungchang Pi Hmingthantluangi, DSO; Fisheries Department chungchang Pu Lalhmunsanga, DFDO; Commerce & Industries Department chungchang Pu Lalrinawma, FM; Land Resources, Soil & Water Conservation (LRS&WC) Department chungchang Pu Israela Hauhnar, RO leh UD&PA Department chungchang Pi R.Lalnunkimi, DUDO ten an sawifiah a. SEDP Form hrang hrang leh a kaihhnawih Pi Esther Leihang, SDC & DLAO Champhai hnen atangin ngaihthlak a ni a, zawhna leh chhanna hun neih a ni bawk.

Department hrang hrang 9 kaltlanga SEDP kalpui tur zingah Animal Husbandry & Veterinary (AH&Vety) Department hnuaiah trade 7; Vawkpui vulh, Vawk talh tur vulh, Rainbow Rooster Ar vulh, Broiler Ar Vulh, Kel vulh, Bawng vulhtu tanpuina leh Sial vulhte a awm a. Agriculture Department hnuaiah trade 4; Vaimim chin, Bekang chin, Fu chin leh Phai lo neih, Wet Rice Cultivation (WRC) te a awm a. Sericulture Department hnuaiah trade 3; Thingtheihmu pangang Mulberry Silkworm, Mutih pangang Eri Silkworm leh Nauthak pangang Muga Silkworm khawite a awm a. Horticulture Department hnuaiah trade 2; Sapthei leh Rua chin, Fisheries Department hnuaiah trade 1; Dil neisate tan Sangha khawi tanpuina te a awm a. Urban Development & Poverty Alleviation (UD&PA) Department hnuaiah trade 4; Mahni in bul leh huana leitha siam (Home composting), Hnawm paih mai tur atanga thil tangkai leh hlu zawk siam chhuah (Waste to Art/ Wealth), khawlai tihfai leh hnawm khawnkhawm (Street sweeping & Waste Collection) leh kawngsira thil zuara inpho (Street vendor) te a awm a. Tourism Department hnuaiah trade 1; Tour Guide a awm a. Land Resources, Soil & Water Conservation (LRS&WC) Department hnuaiah trade 4; Kuhva, Hmunphiah, Rubber leh Coffee chinte a awm bakah Commerce & Industries Department hnuaiah trade hrang hrang thlan tur 23 a awm bawk a ni.