805/2022-2023

Vawiin khan Japan International Cooperation Agency (JICA) team Japan atanga lo kal te leh an thawhpuiten Health Minister Dr R.Lalthangliana chu a pisaah an kawm. Mizoram State Super-Specialty Cancer and Research Centre (MSSSCRC) din tuma ruahmanna kal zelah Pu Hiroshi Ako, Team Leader leh Hanako Miyoshi, Expert, Hospital Management te chuan Health Minister hi a pisaah kawmin hma an lak mek dan, an hmachhawp te leh an thlen chinte an sawipui a ni.

Dr R.Lalthangliana chuan Mizoram hi India ramah cancer hluarna ber a ni a, cancer vei inenkawlna tha tawk kan la neih loh avangin phai damdawi in lianah sum tam tak sengin kan kal a tul thin a, he MSSSCRC hi a puitlin hunah chuan phai pan ngai lovin Mizoramah duh tawka inenkawlna hmun tha kan nei tawh dawn a ni, a ti. Health Minister chuan MSSSCRC dinna tura ruahmanna hi kum 2019 ah buaipui tan a ni tawh a. JICA nena thawk ho thei turin sawrkar laipui Ministry pawimawh External Affairs Ministry, DoNER Ministry, Department of Expenditure leh paltlang tur pawimawh dang te paltlangin dan angin phalna hmuh fel a nih tawh thu vawiin hian a sawi a ni.

MSSSCRC dinna tur hian sum ruahmanna siam tawh zat chu cheng vaibelchhe 500 a ni a. Amaherawhchu, thil man san chhoh vang leh soft component (training, research, early detection, prevention etc) avangin a sum senso tura ruahman tawh sa hi vaibelchhe engemawzatin a pun belh leh dawn a ni. JICA hian an project hi uluk taka vilin vawi engemawzat Mizoram an rawn tlawh dawn a. Survey hna ringawt pawh thla tam tak beih niin tunah hian a hmawr an bawk dawn hnai tawh a. Kumin kum tawp lamah hian survey hi zawhfel theih beisei niin dan ang taka thawhhona tur thuthlung Memorandum of Understanding chu survey zawh fel a nih veleh Mizoram Sawrkar nen an ziak dawn a ni.

JICA nena thawhdunna tur MSSSCRC hi hospital building leh hmanraw pawimawh te chauh dinna tur ni loin Mizoram State tana cancer laka invenna te, cancer natna a zual hmaa hmuhchhuah (early detection), training pek, mipui zirtir leh cancer zirchianna lam hawia beihpui thlak te a tel a. Mizorama Cancer hospital kan neih meka bungrua kan neihsa te nena tangkawp thei turin ruahmanna hi siam a ni a. JICA hian he project hi an ngai pawimawh hle a, a soft component lama ruahmanna a hmuna endik tur hian June thla tawp lam hian mi thiamte Japan atangin an lo zin leh dawn a, Japan University tha tak tak nena thlung zawmin thiamna tipung tura thawhhohna leh inkungkaihna pawh siam a ni dawn, niin vawiin meeting-ah hian sawilan a ni.