Sawrkar Laipuia Ministry of Textiles leh Mizoram Apex Handloom & Cooperative Society Ltd (MAHCO) tangkawp buatsaih nithum awh tur Champhai Special Handloom Expo 2019 chu vawiin chawhma khan Kahrawt  Community  Hall, Champhaiah neih tan a ni a. Hawnna hun buatsaihah Pu Liansangzuala Chhakchhuak, Addl DC Champhai District chu Khuallian niin Champhai Special Handloom Expo-2019 chu a duh apiangte dawra   theih turin a hawng a ni.  

Pu Liansangzuala Chhakchhuak chuan Ministry of Textiles leh MAHCO tangkawpin Champhaia Special Handloom Expo an buatsaih chu lawmawm a tih thu a sawi a. Special Handloom Expo chu puantahtute tana inphochhuahna, hralhna hmun leh mipuite tan pawha awlsam taka an duh zawngte tlawm zawka an lei theihna anih mai piah lamah huam zau zawka Handloom kutchhuakte thehlarna ani tiin, huang zau   leh  hlawk zawka  kalpui anih theihna tura ngaihtuahna siamtu ni thei se a duh thu a sawi a.  Khuallian chuan Co-operative Movement lochhuah dante a sawi zau a, Mizoramah ngei pawh kum 1942 daih tawhah Lushai Hills Superitendent Pu AG Mc Call nupui Pi John Christom Mc Call hmalaknaa Young Lushai Weavers Association din alo ni tawh a ni, a ti a. Champhai Credit Co-operation Union leh Chaltlang Credit Co-operation Union te pawhin March Ni 7, 1960 ah   khan thawhhona an lo nei tawh a ni a ti bawk.

Khuallian chuan Mizo thil thar leh dehchhuah ang angte chu a theihna chenah vawnhim zel a tul thu sawiin, mahni ram leh khawtual irawm chhuak leh siamchhuahte chu  ram leh hmunhma hminga neitu nihna siam zel tura hmalak angaih thu a sawi a. UNO hnuaia General Agreement on Tariffs and Trade (GATT) hnuaiah Intellectual Property Rights (IPR) leh Geographical Identification (GI) te pawh tih zel ni thei se a duh thu sawiin, hei hian hnam ziarang leh mahni thil siamchhuahte vawnhim mai bakah sum lakluhna tha tak pawh a siam thei a ni, a ti a.  Special Handloom Expo puala kalkhawm puantahtute hnenah chuan Hanloom chu eizawnna tlak anih thu sawiin tun aia nasa zawka tan la a hmasawn zel  tum tura  duhsakna  hlanin Champhai Special Handloom Expo 2019 chu a hawng a ni.  

He hunah hian Pu C.Vanlalhruaia, JICS, Co-operative Department Champhai pawhin thusawiin Mizote chu pipute hun ata tawh puantah thiam leh ngaina kan ni a, mahse mamawh erawh kan inphuhru zo meuhlo thin a ni, a ti a. Kum 1977 a MAHCO din hnuah chak taka hmalak  niin tunah chuan Puan intodelh mai bakah thawnchhuaktu kan lo ni ve tawh a ni a ti a. Handloom chu Agriculture Sector tih lohah chuan a lian ber pawl anih avangin Sawrkar laipui pawhin a ngai pawimawh hle a ni, a ti bawk.

Thusawitu dang Pu Lalthanpuia, Chief Manager, Apex Bank Champhai pawhin Champhai chu puantahah tanlak angaih thu sawiin, a ti tak tak leh tuimite tan Bank leh department lamte an inhuam reng thu a sawi a. Puantah chu eizawnna tlak anih avangin mipuiten ngaihven se a duh thu sawiin, Puantahtute chu rilruah quaity tha leh mite duh zawngte  hrerenga puantah  thin turin a chah  a ni.  

Programme hi Pu Lalrinawma Pachuau, Project Manager, MAHCO chuan a kaihruaia,  kalkhawmte lawmna thu sawiin inhmelhriattirna hun a hmang a. Hemi hnu hian Khuallian leh sawm bik chhimtu dangte hnenah thilpek hlan a ni a. Pu RV Lalzara, Board Secretary, MAHCO Ltd in lawmthu sawiin hun a khar a ni. Hawnna programme hman zawh  hnu hian Khuallianin Champhai Special Handloom Expo puala Stall  20 siamte a tlawh kual leh a, hemi hnu hian ni thum awh tur Champhai Special Handloom Expo 2019 chu a duh a piang dawr theih turin hawn tan a ni.

Mizoram Apex Handloom and Handicraft Cooperative Society Ltd. (MAHCO) hi kum 1977 a din a ni a. Thiam hnang deh leh puantah lama tuimite chawikanna leh phochhuahna tura din niin Mizoram Society-te zinga upa ber pawl a ni. Tun dinhmunah MAHCO hnuaiah Handlooom Society 183 an in ziaklut tawh a. Special Handloom Expo-2019 hi Mamit, Lunglei leh Kolasib-ah neih a ni tawh bawk a ni.