Sawrkar laipui Ministry of Textiles hnuaia Development Commissioner for Handlooms, New Delhi leh Mizoram Apex Handloom & Cooperative Society Ltd (MAHCO) tangkawp buatsaih, March Ni 4-6 chhunga neih tur Champhai Special Handloom Expo 2020 chu vawiin chawhma khan Kahrawt Community Hall, Champhaiah neih tan a ni. Hawnna hun buatsaihah hian Pu Lalrinsanga, Addl. Registrar, Cooperative Societies, Government of Mizoram chu khuallian niin, a duh leh mamawh a piangte dawr theih turin Champhai Special Handloom Expo 2020 chu a hawng a ni.

Khuallian Pu Lalrinsanga chuan MAHCO awmzia leh hmalaknate sawizauin, MAHCO chu apex body, handloom society zawng zawngte hmun khata thuikhawmtu a ni, a ti a. Mizo incheina leh thuam hrang hrangte chu thiamna sang zelah chei danglamte pawh ni thin mahse, a pawimawh ber chu hmanraw tha leh tlo tak hmanga kan siam hi a ni, a ti a. Puantahtute chu thil tlo leh tha, daihrei tak siam chhuah kawnga tan la zel turin a fuih a. Special Handloom Expo huaihawt kaltlangin mipuite’n man man zawka an duh leh mamawhte an lei theihna tura remchanna chhawpchhuah sak a tul thu pawh a sawi a. Champhai chu Mizoram Cooperative Societies thahrui leh chakna hmun pawimawh tak anih thu tarlangin, Cooperative Society puala project lian tak tak kalpui thinte chuan Mizoram mai piah lamah hmun dang atanga tlawhtu lokalte a hneh em em zel thin a ni, a ti bawk a. Kalkhawmte chu Cooperative kalphungte hre thar leha, District Office-te nena thahnem ngai taka thawk dun zel tur leh an mamawhte pawh inthlahrung hauh lova thuneitute hnena thlen zel thin turin a chah a. Champhai Special Handloom Expo 2020 chhim tura puantahtu thahnem tak an tel thei chu lawmawm tiin, Champhai district leh a chhehvelte’n tangkai taka an hman theihna tura duhsakna hlanin Champhai Special Handloom Expo 2020 chu mamawhtu apiangte dawr thei turin a hawng a ni.

Thusawitu dang Dr.Lallawmkima, DIPRO Champhai chuan Ministry of Textiles leh MAHCO tangkawpin Special Handloom Expo-2020 Champhai hmuna an buatsaih chu lawmawm a tih thu a sawi a. Mizo hnam incheina leh hnam ziarang pholanna hunpui chu puantahtute leh mipuite tana hlawkna leh remchanna tha tak ni a a hriat thu sawiin, puantahtute chu eizawnna mai bakah hnam ziarang pholangtu an ni tih inhre thara theihtawp chhuah chhunzawm zel turin a fuih a ni.

He hunah hian Pu C.Lalbethlehema, ARCS Champhai pawhin thusawiin, mahni hnam incheina ngaihsanna chang kan hriat lehzual angaih thu a sawi a. Hnam thuam leh incheinate chu ngaihlu thiama, zah tak chungin anihna ang tur taka kan hman tangkai thin angai a ni, a ti bawk.

Programme hi Pu Lalrinawma Pachuau, Managing Director, MAHCO chuan kaihruaiin, kalkhawmte lawmna leh inhmelhriattirna a nei a. Pu C.Vanlalhruaia, Senior Inspector, Co-operative Societies, Champhai pawhin thu a sawi bawk a. Pi C. Zahnuni, Manager, MAHCO-in lawmthu sawina hun hmangin hawnna hun hi a khar a ni. Hawnna programme hman zawh hnu hian khuallianin Champhai Special Handloom Expo puala Stall 25 siamte fangkual lehin, hemi hnu hian ni thum awh tur Champhai Special Handloom Expo 2020 chu a duh leh mamawhtu apiangte dawr theih tura hawn tan a ni. Handloom Stall-ah te hian Mizoram hmun hrang hrang atanga puantah thiamte kutchhhuak incheina leh hnam thuam hrang hrang mawi tak tak zawrh chhuah a ni a, Champhai mipuite chu Special Handloom Expo 2020 chhim vek turin an sawm a ni.

Mizoram Apex Handloom and Handicraft Cooperative Society Ltd. (MAHCO) hi kum 1977 a din a ni a. Thiam hnang deh leh puantah lama tuimite chawikanna leh phochhuahna tura din niin, Mizoram Society-te zinga upa ber pawl a ni a. Tun dinhmunah MAHCO hnuaiah Handlooom Society 89 leh Individual member 75 te an inziaklut tawh a ni. Financial year 2019-2020 chhungin Mizoramah Special Handloom Expo pathum Ministry of Textiles atangin huaihawt tura pawmpuina hmuh a ni a, Kolasib leh Lunglei lamahte neih tawh niin, 2019-2020 Financial year bik atan Champhai hi a tawpna tur a ni.

Tun dinhmunah Mizoramah Handloom Cluster 10 awm mekin, Mizo hnam puan 5; Mizo Puanchei, Ngotekherh, Puandum, Hmaram leh Tawlhlohpuan te hi a neitu nihna Geographical Indication (GI) tag/registration pek tawh kan ni a, Mizo puan pahnih (2)-Mizo Puanchei leh Tawlhlohpuan te hi August Ni 16, 2019-ah register a ni a. A dang pathum (3)-Ngotekherh, Pawndum leh Hmaram te hi August Ni 22, 2019-ah register a ni bawk. Handicrafts lamah pawh GI registration nei tura hmalak a ni bawk.