No.4155/2021-2022
Aizawl, the 2nd March, 2022: Sawrkar laipui Ministry of Textiles hnuaia Development Commissioner for Handlooms, New Delhi leh Mizoram Apex Handloom & Cooperative Society Ltd (MAHCO) tangkawp buatsaih Champhai Special Handloom Expo March ni 2-4, 2022 chhunga neih tur chu vawiin chawhma khan Champhai Vengthlang YMA Hall-ah neih tan a ni. Hawnna hun hi Champhai District Bawrhsap mawhphurhna la mektu Pu Henry C.Lalrawnkima, Addl. DC Champhai chuan khuallian niin a hmanpui a, a duh leh mamawh apiangte dawr theih turin ni thum awh tur Champhai Special Handloom Expo 2022 chu a hawng a ni.

Pu Henry C.Lalrawnkima chuan Special Handloom Expo 2022, Zokhawpui Champhaia neih a ni thei chu lawmawm tiin, buatsaih a nih theihna kawnga Development Commissioner for Handlooms, New Delhi leh MAHCO te bakah tha thawhtute fakawm a ti a. Handloom Expo kaltlanga dawr hrang hrang hawngtute thinlung taka a lo lawm thu a sawi bawk a. Handloom bika Champhai District dinhmun tlangpui tarlangin, tun aia nasa zawkin tanlak a ngai a ni, a ti a. MAHCO chu handloom leh handicraft chawilar kawnga tanhopuiah sawmin, District Administration leh Line Department hrang hrang ten puih an inhuam reng thu a sawi bawk.

State lian lo tak Mizoramah puantah leh thiam hnangdeh handloom & handicraft sector a pawimawh zual thu pawh sawiin, kut themthiamna hmanga eizawngtute chu mahni kutkea dinga mahni inpuih hmasak tum thin turin a fuih a. Vawilehkhata hlawk thut tum kher lova dawhthei taka bei hram hram thin turin a chah a. Kuthnu mam leh pawr lo, belhchian dawl nei tura tang thar tur leh thlen china lungawi mai lova, midangte aia tha filawr bik ni thei tura ngaihtuahna tam zawk seng turin a ngen bawk a. Dawrtute tana dawr nuam leh hawihhawm tak nih tum tura chahin, min dawrtute an pawimawh a ni tih hria a, dawrtu rinawm neih tuma rilru siam rem hret hret turin a fuih bawk.

Khuallian chuan Mizoram mai nilo ram chhung hmun dang leh pawn thlengpha thei tura thil siamte cheibawl kawnga ruahmanna neih a ngaih thu leh, hnam dangte pawhin an duhtlan theih tur zulzui hralh kal thei tur ngaihtuah chhuah tum turin a chah a. Mizoram chhung mai bakah State pawn thlenga buatsaih thin Handloom Expo a tel thei tura inruahman tur leh, kut themthiamna bakah thluak themthiamna nei tura tanlak angaih thu sawiin, chutiang neite chu an dingchang nge nge thin a ni, a ti bawk. Champhai District mipuiten tangkai taka an hman theih nana duhsakna hlanin Champhai Special Handloom Expo 2022 chu mamawhtu apiangte dawr thei turin a hawng a ni.

He hunah hian Pu C.Vanlalhruaia, Senior Inspector of Co-operative Societies, Champhai pawhin thusawiin, Agriculture sector dawtah Handloom sector hnuaiah eizawnna nei an awm tam ber avangin sawrkar laipuiin handloom sector a ngaipawimawh em em a ni, a ti a. Champhai District-ah Handloom Co-operative Society 3 chauh a awm thu leh tanlak nasat a ngaih thu sawiin, mahni a puan tahte chu hamthatna an dawn theih nan midangte nen intelkhawmin Co-operative Society din zel turin a chah a. District Administration leh MAHCO te pawh bengvar leh puih an ngaihna zawnahte an biakrawn zel dawn thu a sawi bawk.

Champhai Special Handloom Expo 2022 hawnna programme hi Pu Lalrinawma Pachuau, Project Manager, MAHCO chuan kaihruaiin, kalkhawmte lawmna leh inhmelhriattirna a nei a. India rama Handloom Expo 200 chuang huaihawt zingah Mizoram tan 5 remtih a nih thu leh, heng zinga 3 te chu MAHCO kaltlanga buatsaih tura tih a nih thu a sawi a. Central lam atanga endiknate neih thin a ni, a ti bawk. Hawnna hun hi Pi Lalremsangpuii, Cluster Development Executive (CDE) MAHCO chuan lawmthu sawiin a khar a ni.

Hawnna programme hman zawh hnu hian khuallianin Champhai Special Handloom Expo puala Stall 30 siamte a fangkual a, hemi hnu hian ni thum awh tur Champhai Special Handloom Expo 2022 chu a duh leh mamawhtu apiangte dawr theih tura hawn tan a ni. Handloom Stall-ah te hian Mizoram hmun hrang hrang atanga puantah thiamte kutchhhuak incheina, hnam thuam hrang hrang mawi tak tak zawrh chhuah a ni a, Champhai mipuite chu Special Handloom Expo 2022 chhim vek turin an sawm a ni.

Mizoram Apex Handloom and Handicraft Cooperative Society Ltd. (MAHCO) hi kum 1977 a din a ni a. Thiam hnangdeh leh puantah lama tuimite chawikanna leh phochhuahna tura din niin, Mizoram Society-te zinga upa ber pawl a ni a. Tun dinhmunah MAHCO hnuaiah Handloom Society 92 leh Individual member 75 te an inziaklut tawh a ni. Tun Financial year chhung hian MAHCO kaltlangin Mizoramah Special Handloom Expo pathum Ministry of Textiles atangin huaihawt tura pawmpuina hmuh a ni a, Lungleiah neih tawh niin, Champhai a neih zawh hnu hian Serchhipah buatsaih leh tum a ni.

Tun dinhmunah Mizoramah Handloom Cluster 11 awm mekin, Mizo hnam puan 5; Mizo Puanchei, Ngotekherh, Pawndum, Hmaram leh Tawlhlohpuan te hi a neitu nihna Geographical Indication (GI) tag/registration pek tawh kan ni a, Mizo puan pahnih (2)- Mizo Puanchei leh Tawlhlohpuan te hi August ni 16, 2019 ah register a ni a. A dang pathum (3)- Ngotekherh, Pawndum leh Hmaram te hi August ni 22, 2019 ah register a ni bawk.

Champhai Special Handloom Expo neihna kiangah hian Mizoram State Legal Services Authority leh Champhai District Legal Services Authority-te tangkawp chuan 'Dan hriat loh hi chhuanlam a tlinglo' tih thupui hmangin a duh leh mamawhtu apiangte pan theih turin dan lam inzirtirna leh puihna 'Mega Camp - Mobile Legal Aid Clinic' an buatsaih bawk a. Hemi kaltlang hian dan lama harsatna neite tan a thlawna Ukil rawn theihin a awm a. Affidavit siam theih a nih bakah, a thlawnin dan bu lak theih a ni bawk.