No.4156/2021-2022
Aizawl, the 2nd March 2022: Governor Hari Babu Kambhampati chuan Mizoram mipui tam zawkin Central Sawrkar Scheme atanga hamthatna an neih theihna tura a hmalakna chhunzawmin hemi chungchang hi vawiin khan Mizoram Baptist Kohhran Hruaitute a sawipui a. Hun hmasa lamah Presbyterian Kohhran Hruaitute a lo sawipui tawh bawk a ni.

Governor Hari Babu Kambhampati chuan Baptist Church of Mizoram (BCM) in mipui vantlang rawngbawlna huangah hna tha tak a thawk thin a, a thawk mek zel tih a hriat thu te, Zirna leh tihdam rawngbawlna huanga an hnathawh te chhuanawm a tih thu te a sawi a. Baptist Kohhran hruaitute chu an kohhranmite kaihruaia rawng an bawlnaah leh vantlang rawngbawla an fehchhuahna hmun a piangah mipui hamthatna tura sawrkar scheme tha tak tak te sawi tel thin turin a ngen a ni.

Governor Hari Babu Kambhampati chuan Mizoram hmun hrang hrang a tlawh hnu leh tlawmngai pawl hruaitute a kawm hnuah Mizoram mipui tam zawkin Central atanga Social Security Scheme tha tak tak te an hriat loh avangin an dawng lo tih a hmuh chhuah thu a sawi a. Hei hi thinlung taka a vei thu sawiin vawi tam tak Bank te, Sawrkar Department hotute leh Tlawmngai pawl hruaitute a kawmnaah pawh a sawi thin a. Mizoram mipui tam thei ang berin Central Sawrkar atanga hamthatna an dawn chu an chanvo a ni a; tunah zirtirna tha tawk rihlo mahse hriattir ngei chu an chanvo a ni a ti. Governor chuan Mizoramah Kohhran chu mipuite rawngbawltu pawimawh ber pakhat a ni a; mipuiin kohhran hruaitute thu an ngaichang a, kohhran hruaitute thusawi chu zawm a hlawh a. Hei vang hian Mipui ten thil tha an dawn theihna turin Kohhran hruaitute chu an hun leh hmun remchang neihnaah te thanem ngai taka welfare scheme leh social security scheme te mipui zirtir turin a ngen tiha sawi a ni.

Governor chuan Mizorama Bank darhzau ber leh Beneficiary ten Central Scheme an zawm theihna thawk tha ber in customer bank account nuai 9 a neih lain Central Scheme dawn theihna tura zero balance account a neih zat chu 50,000 chuang awrh a ni tih a sawi a. Hei hian Bank lamin an customer te hamthatna tur an zirtir tam tawk lova, official te pawhin mipui zirtirna an kalpui chak tawk lo tih a chiang a. Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana(PMJJBY), etc., te chu miharsa zawk te tan a cheng tlemte seng a insurance leh security scheme tha lutuk an neih theih na a ni a. State dangah mipui tam zawkin a hamthatna an tel lai a, Mizoram mipuiin a hre lo hi thil pawi tak a ni a ti a. Sawrkar leh Bank ten staff indaihlohna avanga zirtirna an kal chak pui theih loh pawhin Mizoram mipui rawngbawltu tlawmngai pawl leh kohhran hruaituten thahnem an ngaih phawt chuan benefiaciary tam zawk an awm theih a rin tlat thu Governor chuan a sawi a ni.

Governor nena an inkawmnaah hian BCM Hruaitute chuan Mizoram mipui te hamthatna tura thahnem ngai tak Governor kan nei chu lawmawm an tih thu an sawi a. Governor sawi ang hian heng scheme tha tak tak te hia an hriat ngai loh deuh vek a ni tih an sawi a ni. Governor thahnem ngaihna leh Mizoram mipuite a duhsakna chu an hriatthiampui tih sawiin hun remchang apiang mipui zirtirna pawh kalpui tha an tih thu an sawi bawk a ni.

BCM chuan Lungleiah Headquarter neiin Kohhran rawngbawlna chu Zirnaah leh tihdam rawngbawlna huang thleng a an kalpui thu an sawi a. Mizoram chhung leh pawnah College atanga pawl hniam ber zirna thlengin zirna in 100 chuang an enkawl mek thu te leh Sawrkar Damdawiin te a tam tawk loh avangin Hospital pahnih leh Nursing College te an theih ang tawka tha in an kalpui tih an sawi bawk a ni. BCM hruaitute chuan Governor hnenah hian Mizorama cheng tam ber chu Kristian te kan nih thu an sawi a. Hetih laia Pathianni a inthlan hmachhawn a ngai fo thin te, Exam buatsaih a ni thin te chuan an rilru a tihnat thu an thlen bawk a ni.

Governor leh Mizoram Baptist Kohhran Hruaitute inkawmnaah hian BCM leadership lam atangin Rev Dr Zolawma, President Elect, BCM, Rev Dr R.Lalthanmawia, Executive Secretary, Aizawl, Rev T.Lalsangvunga, Pastor, Central Church bialtu Pastor leh Rev K.Lalbiakchhawna, Bawngkawn bialtu Pastor te an tel a ni.