2085/2026-2027

Dated Champhai, the 7th September 2026: Vawiin khan DC Conference Hall Keifangtlangah, Champhai District Bawrhsap, District Election Officer ni bawk Pu Mohammad Aaquib chuan Special Intensive Revision 2026 neih meka Champhai District chhunga Assembly Constituency pathum 23-Champhai North, 24-Champhai South leh 25-East Tuipui A/C te tana Final Electoral Roll a tlangzarh.

District Bawrhsap hian Final Electoral Roll tlangzarhnaah hian thu a sawi a. Champhai District-a Special Intensive Revision hlawhtlin theihna tura thawktu zawng zawng Dy.DEO, Election Officer, ERO, AERO, Election Office-a thawktute, BLO Supervisor, BLO, Addl BLO leh Booth Level Standing Committee member, Village Council, tlawmngai pawl leh political party aiawh zawng zawng te chungah lawmthu a sawi a. Mipuite hnena thuthar a hun taka thlensak thintu DIPRO leh a thawhpuite bakah MJA member zawng zawng te chungah lawmthu a sawi bawk a ni. 

Champhai Election Officer Pu Ngulzaṭhuama'n Special Intensive Revision 2026 kalpui a nih dan kimchang a sawifiah a. Stage hrang hranga tihsual a awm lohna tura theihtawp an chhuahna leh an fimkhur dan hrang hrangte a sawifiah bawk a ni.

Final Electoral Roll-ah hian Champhai District chhunga Assembly Constituency pathumah voter 56,498 an awm a. Vote tamna ber 24- Champhai South-ah voter 21288 (mipa 10191 leh hmeichhia 11097) awmin, 23-Champhai North-ah voter 20041 (mipa 9725 leh hmeichhia 10316) leh 25-East Tuipui-ah voter 15169 (mipa 7662 leh hmeichhia 7507) an awm a. Hei bakah hian Champhai North-ah Service Voter mi 124 (mipa vek), Champhai South-ah service voter mi 143 (mipa 141 leh hmeichhia 2) leh East Tuipuiah Service voter mi 109 (mipa 108 leh hmeichhia 1) an awm bawk a, District pumpuiah Service Voter 376 an awm a ni.

Claims and objection hun chhunga dilna atangin vote nei thar mi 2550 an awm a (23 Champhai North-937, 24 Champhai South-897 leh 25 East Tuipui-716). Hmun dang atanga rawn pem lut 519 awmin (23 Champhai North-177, 24 Champhai South-251 leh 25 East Tuipui-91), chhan hrang hrang avanga paih 2983 an awm bawk a ni (23 Champhai North-639, 24 Champhai South - 1266 leh 25 East Tuipui 1078).

Final Electoral Roll tarchhuah taka lungawi lo te chuan Section 24(a) of RP Act 1950-in a tarlan angin, District Magistrate hnenah Final Electoral Roll tarchhuah a nih atanga ni 30 chhungin an appeal thei ang a. District Magistrate thutluknaa lungawi lo te chuan Section 24(b) of RP Act 1950-in a tarlan angin Chief Electoral Officer hnenah ngenna an thlen thei ang.  

Final Electoral Roll copy hi mipui, a duh apiang te tana en theih turin CEO Mizoram leh DEO Champhai website-ah tarlan a ni a, hei bakah Registered Political Party, bialtu ERO, AERO leh BLO te hnenah pek chhuah a ni bawk a ni