665/2026-2027

Champhai dated 22nd May, 2026: Vawiin khan Special Intensive Revision (SIR), 2026 kalpui tura inpuahchah dan tur ngaihtuahin DC Conference Hall, Keifangtlangah District Level Standing Committee an thukhawm.

He hun hi Pu Lalbiakfela Addl DC, Champhai chuan a kaihruai a, Pu Ngulzathuama Election Officer-in Special Intensive Revision, 2026 kalpui dan tur sawifiahna hun a nei a ni.

Election Commission of India chuan Article 324 of the Constitution of India, Section 21 of the Representation of People Act leh Registration of Elector Rules, 1960 te'n thuneihna a pek angin India rama State leh Union Territory zawng zawngah Special Intensive Revision of Electoral Roll a kalpui mek a, Mizoramah pawh SIR hi May ni 20 atang khan kalpui tan a ni a, September ni 6, 2026 thleng a awh dawn a ni. Champhai District ah pawh SIR kalpui tur hian inbuatsaihna engkim peihfel thawkhat tawh a ni a, Electoral Roll-a chuang mek voter zawng zawngte tan Enumeration Form peih fel tawh a ni a, hemi pual hian ERO, AERO, BLO Supervisor leh BLO te bakah Political Party aiawh Booth Level Agency te tan training buatsaih tura ruahhmanna siam a ni bawk.

SIR hi kalpui a nih hma hian Mizoram chhunga SIR hnuhnung ber kum 2005-a Roll-a chuangte leh an thlahte enmil hna chu thla engemawzat kalpui a ni tawh a, Mizoram Elector pumpui atangin za zela 81.57 chu enmil tawh an ni a, Champhai District bikah hian za zela 86.32 enmil an ni tawh bawk. Enumeration form leh kum tling tharte tan form 6 leh declaration form te hi BLO te'n in tinah an sem dawn a, BLO te hian an lakhawm leh vek dawn a, form fill up thiam lote an pui nghal dawn bawk a ni.

Tun tum Special Intensive Revision-ah hian Electoral Roll hi a thar hlaka buatsaih tur a ni dawn a, a hun chhunga Enumeration form thehlut lote chu Draft Electoral Roll-ah an chuang dawn lova, vote la nei lo anga ngaih niin a thar hlakin an dil a ngai tawh dawn a, EPIC thar pek an ni ang a, an EPIC number ngai an hmang thei tawh dawn lo a ni.

He hunah hian SIR kalpui laia Political Party te mawhphurhna kawng hrang hrang sawifiah a ni a, Enumeration form dah khah dan turte chipchiar taka sawifiah a ni bawk.

Assembly Constituency 3 awm mekah SIR 2005 ah khan Electors 39,168 an awm a, 23-Champhai North A/C ah 14,029, 24-Champhai South A/C ah 13,155 leh 25-East Tuipui ah 11,984 te an awm a, kum 2026 May thla thleng hian Electors 58,850 an awm tawh a, 23-Champhai North A/C ah 20,438, 24-Champhai South A/C ah 22,444 leh 25 East Tuipui ah 15,968 te an awm mek a, Polling Station hi 30 a awm mek bawk.

Meetingah hian khawtlang hruaitu department hotu, VC, YMA, MUP te bakah Political Party aiawhte an kalkhawm a ni.