No.7505/2020-2021

Sawrkar laipuia Ministry of Micro, Small & Medium Enterprises (MSME) leh Mizoram Handloom & Handicrafts Development Corporation Ltd. (ZOHANDCO) tangkawpte chuan vawiin khan National SC/ST Hub (NSSH) kaltlangin ‘Explore your options’ tih thupui hmangin Special Vendors Development Programme, I&PR Auditorium, CHANEM Champhaiah an buatsaih. He hun hi Pu R.Lalnghakliana, Addl. DC Champhai chuan Khuallian niin a hmanpui a ni.

Hawnna hun ZOHANDCO Superintendent Pu Vanlalfaka kaihhruaiah Khuallian chuan thusawiin, Champhai District chhunga Vendor-te puala ZOHANDCO-in Special Vendors Development Programme a  buatsaih  chu lawmawm  a tih thu leh a hlawhtlin theihna tura tha thawhtute chungah lawmthu a sawi a. Mahni hnam ziarang leh  thuamte chawisang kawnga ZOHANDCO hnathawh chu chhuanawm a tih thu leh kan hnam ziarang pho chhuak turin keimahni theuh kan pawimawh hmasak thu  a sawi a. Tualchhung mamawh khawp chauh siam lova ram chhung leh pawn thlenga thawnchhuah tham dehchhuah a tul thu sawiin, mite mit la leh hralh tlak ni tura tanlak erawh a tul dawn a ni, a ti. Thangtharte zingah hnam incheina leh ziarangte hre lo tam tak an awm chu veiawm a tih thu sawiin, hrilh hriat kawngah theihtawp chhuah tlan a ngaih thu a sawi a. Sumdawnna hmun pawimawh tak Champhai District chhunga Special Vendors Development  Programme buatsaih a ni chu inhmeh a tih thu leh tangkaipui ngei a beisei thu a sawi a.  Hlawhtling taka hman a nih ngei  theihna turin duhsakna  a hlan a ni.

Thusawitu dang ZOHANDCO Chairman Pu C.Lalrammawia chuan ZOHANDCO kaltlanga Mizo thuam leh ziarang hrang hrangte vawnhim chhunzawm zel  tum a nih thu sawiin, hnam thuam leh ziarangte chu nitin khawsakna, hnathawhna hmun leh pupuinaahte kan lantir phawt chuan khawvelin min hriatpui dawn a ni, a ti a. Hnam dangte tihdan lachhawng mai lovin mahni kutchhuak ngei kan chawisan uar deuh deuh a tul thu  sawiin, Mizo mipuite chu eizawnna puitling leh ngelnghet nei tura sawrkar laipui scheme pawimawh tak tak awm zingah National Scheduled Caste/ Scheduled Tribe Hub (NSSH) hmelhriat tur leh tangkai zawka chhawr tum turin a chah a. ZOHANDCO chu puantah leh thiamhnangdeh lama eizawngtute hmasawnna tur thlira mizo mipuite tana tuaithar anih thu leh hun hmasa lama thiah tawh chu sawrkar tharah CM kaihruaina hnuaiah tundin that leh a ni, a ti bawk.

Vendors Development Programme chu thil siam chhuah leitu leh hralhtute intawhkhawmna tura buatsaih a nih thu tarlangin,  NSSH chuan India ram tlangmi tribal-te zinga sumdawnna chawisan leh hmasawn tir chu a tum bulpui a nih angin Mizoram Sawrkar-in ngaihvenin a bawhzuia, Industries Department chu hmalatu niin ZOHANDCO chu Implementing Agency (IA) atan hman a ni a, hemi kaltlang hian vawiin hian Champhaiah Vendors Development Programme chu buatsaih a lo ni ta a ni, a ti a. Special Vendors Development Programme buatsaih chuan rah tha tak chhuah se a duh thu sawiin, kalkhawmte leh ngaithlatu mipuite chu hlawhtling taka hman a nih theihna tura tanlakpuiah a sawm a ni.

Vendors kalkhawmte hnenah hian Sawrkar Department leh Bank atanga mithiam Resourse person tura sawm te’n zirtirna pein Vendor-te  hriat atana tangkai leh an hmalak leh zelna tura tul ni a an hriatte an hrilhfiah a. Zirtirna hun hi chawhma leh chawhnuah neih a ni a, Pu F.Malsawmtluanga AO, DRDA, Pu TT Laltanpuia DEO, Pi C.Lalhmachhuani HEO, Pi Hmingthantluangi DSO, Pu C.Lalhriatpuia PD, ATMA leh Pu Lalremruata Asst. Manager, MRB te’n zirtirna an pe a. Pi Laldampuii Khiangte, Board of Director, ZOHANDCO kaihhruaiin zawhna leh chhanna hunte hman chhunzawm a ni bawk.

National Scheduled Caste/ Scheduled Tribe Hub (NSSH) hi Ministry of Micro, Small and Medium Enterprise (MSME) hnuaia programme pawimawh tak pakhat niin, National Small Industries Corporation (NSIC) kaltlanga hmalakna turin India Prime Minister Pu Narendra Modi chuan October 2016 khan a tlangzarha. NSSH tum ber chu Scheduled Caste/Scheduled Tribe Enterprise-te hmasawnna tura kawng hrang hranga hmalak a ni. He scheme hnuaiah hian component hrang hrang 4; Exhibition/Trade Fair, Seminar/Workshop/Awareness campaign, Skill Development Training leh Special Vendors Development Programme-te a awm a, Special Vendors Development Programme tih loh component dangte hi  neih zawh thawkhat niin, Special Vendors Development  programme hi a hmasa ber atan Champhaiah buatsaih a ni.

Special Vendors Development Programme-in a tum lian ber pakhat chu sumdawnna fawng vuantu SC/ST te zinga Micro & Small Enterprises chawikang tura sawrkar hmalakna hrilhhriata, Public Procurement-ah SC/ST sumdawngte nasa zawka an tel theihna tura inhmelhriat tawnna siam a ni a, ram chhung hmun hrang hrangah NSSH kaltlangin Special Vendors Development Programme hi buatsaih thin a ni.