4353/2024-2025

Champhai, 20th February 2025: Vawiin chawhma dar 11:00 khan State Day of Prayer Committee (SDPC) Champhai District bultumin 'Mizoram State Day of Prayer' chu CDFA Playground-Chhangphut Field-ah hman a ni.

He hun hi Rev. H. Lalrinmawia, Chairman, State Day of Prayer Committee, Champhai chuan a kaihruai a. Champhai Bawrhsap Pu VL Remliana chuan hawnna thu a sawi a ni. Pu VL Remliana chuan Mizoramin a mamawh ber chu tih tak takna nena thil tih a ni, a ti a. Ram hruaina kawngah te, eizawnna kawngah te leh ṭawngtainaah te tih tak tak na nen kan bei anih phawt chuan khawtlang leh kohhran nunah malsawmna nasa tak kan dawn a rinawm a ni, a ti. Bawrhsap chuan Mizo khawtlang nun eichhetu sual hrang hrang te chu ṭawngṭaina hmanga beih let mai bakah tlanchhiat san a ṭul tih sawiin, kalkhawmte chu he mi kawnga ṭan lakpuiah a sawm bawk a ni.

Vawiin ṭawngtai rual hunah hian Rev. Albert Lalchhanhima chuan Fiji Challenge thupui sawizauna hun a hmang a. Pu Vanlalchhuanawma Chhangte pawhin thu a sawi bawk a ni. Ṭawngtai rualna hun hi hun thumah ṭhen a ni a, Champhai khawpui chhunga zaipawl hrang hrang ten a huhovin ‘Halleluiah Chorus’ an sa a, zaikhawmna hun a tam thei ang bera hman a ni bawk. Pu Lalchhuanawma, Joint Secretary, State Day of Prayer Committee in lawmthu sawiin, Rev. T. Sawmliana chuan malsawm tawngtainain hun a khar a ni.