4352/2024-2025

Aizawl, the 19th of February, 2025: Nimin leh Thawhtanni khan Ministry of Skill Development & Entrepreneurship (MSDE) hnuaia Sports, Physical Education, Fitness and Leisure Skill Council (SPEFL-SC) CEO Pu Tahseen Zahid chu Aizawlah rawn zinin, Mizoram Sports Minister Pu Lalnghinglova Hmar nen SPEFL-SC kaltlanga Mizo thalaite tan sports leh skill kaihkawp dan tur an sawi dun.

MSDE hnuaia SPEFL-SC kaltlang hian sports kaihhnawih job role 41 ah training theih a ni a. India ram hmun hrang hrangah Training Centre neiin mi nuai 41 train tum a ni. An job role zingah a  bikin sports coaching, Physical Education leh Fitness trainer te chu Mizoramin a mamawh tih hriain, LESDE leh Sports Minister Pu Lalnghinglova Hmar chuan Pu Jayant Chaudhary, Union Minister for Skill Development and Entrepreneurship leh Pu Atul Kumar Tiwari, Secretary to Government of India, MSDE te chu hmaichhanah a lo sawipui tawh a. Proposal pawh MSDE-ah thehluh tawh a ni nghe nghe. Union Minister leh Secretary te’n Mizoram Sawrkar leh SPEFL-SC te chu indawr chhunzawm tura an lo rawn angin leh, Mizoram Sports Minister in a sawm angin SPEFL-SC CEO Pu Tahseen Zahid hi Mizoram-ah a rawn zin ta a ni.

Sports Minister Pu Lalnghinglova Hmar leh Pu Tahseen Zahid te hi Thawhtanni tlai khan Sports Minister office-ah an inkawm a, nimin chawhma dar 10:30 khan Labour, Employment, Skill Development & Entrepreneurship (LESDE) Department leh Mizoram State Sports Council official te telin thawhho dan tur an sawiho leh a ni. Thawhho dan tur tlangpuiah Nodal Department atan LESDE Department ruat te, Training Partner atan Mizoram State Sports Council hman te a tel a. Vision 2036 Olympic nei chunga kalpui tur ‘Bana Kaih Empowering Mizoram Sports’ a trainer tur te tan ‘Training of Trainers’ kalpui leh, school hrang hranga zirtirtute tan Physical Education training neih te a tel bawk.

SPEFL-SC CEO Pu Tahseen Zahid chuan Mizoram Sports Minister in zin tura a sawmna chu lawmawm a tih thu sawiin, Mizoram proposal thehluh chu tihhlawhtlin ngei an duh a ni a ti a. MSDE leh SPEFL-SC kalphung awmsa mila her rem hret hret ngai lai te sawiho a, a hlawhtlin theihna tur ngaihtuahin Mizoramah a lo zin tih a sawi a ni.

Meeting-ah te hian Pu Lalmalsawma Pachuau, Secretary, LESDE bakah Pu John Tanpuia, Director, LESDE leh Pu Henry C. Lalrawnkima, Secretary, Mizoram State Sports Council te’n Minister hi an tawiawm a ni.