4351/2024-2025

Dated Aizawl: the 19 February 2025 : Vawiin chawhnu dar 2:00 khan Directorate of Land, Revenue & Settlement Conference Hall ah Revenue Minister Pu B.Lalchhanzova chuan, e-ram portal go-live na hun a hmang.

Go-live hunah  hian Minister chuan thu sawiin e-ram chu hun rei tak atanga nghakhlel taka thlir anih hnuah a taka hman tan a ni ta chu lawmawm a tih thu a sawi a. Chief Minister Pu Lalduhoma chuan  November ni 4, 2024 khan a hawn tawh thu leh hman nghal a nih dan te leh application pawh engemaw zat a luh tawh thu a sawi a. e-ram ah chuan Land Revenue & Settlement department hmalakna dang: mipui ten Empanelled survey firms-te an dawr theihna tur bikah siam fel ngai te siam fel anih hnuah go–live theih a ni ta chu lawmawm a tih thu a sawi.

Minister chuan Surveyor indaihlohna avanga ram teh tur rei tak tak nghah ngai thin chu survey firms te e-ram kaltlanga hman theih  a ni ta chuan mipui tan awlsamna nasa tak a thlen a beisei thu sawiin, Go-live a nih theih nana tihfel ngai leh siam rem ngai te siam a nih hnuah   a taka mipui leh office lama thawktu ten an hmang tan thei tawh tur chu lawmawm a tih thu a sawi a. e-ram chu sawrkar langtlang, mipuite awlsamna thlen tu leh eirukna dona kawnga hmanraw pawimawh tak anih tur thu  a sawi bawk a ni.

E-ram ah hian service sawm leh pakhat (11) a awma: ram teh, ram teh that, ram then, ram pawhkhawm, ram hmingthlak leh adangte chu office a kal kher tawh lovin online in mahni awm hmun atangin  dil tawh tur a ni dawn a. A dil dan hi process awlsam te mah nise mahnia ti thiam lo tan pawh Common Service Centre (CSC) kaltlangin dilna te chu a thehluh theih dawn a ni.

Mipui te chuan  e-ram hmang hian an dilna te an thehluh bakah, an dilna in a ken tel fees zawng zawng pawh online in an pe vek thei tawh dawn a, an dilna thlen chin leh khawiah nge a tan tih te an hmu thei vek tawhin, Office kal buai kher ngai lovin an thil dil thlen chinte an hre thei vek tawh dawn a ni.

Minister hian application lut hmasa pali te chu e-ram portal atangin detailment a siam a, applicant-te payment tihtirin, detailment order pawh online-in a dawntir nghal a; tihian E-, ram chu a go-live a ni.

Vawiina Go-Live programme hi Pu Vanlalmawia, Secretary LR&S chuan a kaihruai a. Pu R Lalthazuala , Director, LR&S chuan report tawi a pe nghal bawk a ni.