4555/2025-2026

Champhai, 20th February 2026: Vawiin chawhma dar 11:00 khan Champhaiah "I dinthar leh ang u" (Nehemia 2:7) tih thupui hmangin State Day of Prayer New Champhai Field-ah hman a ni.

He hun hi Rev. Vanlalliana Sonset, Chairman, State Day of Prayer chuan hun a kaihruai a. Rev E. Vanlalpeka Zote, Secretary, State Day of Prayer in thupuanna neiin Pu James Lalnithanga, Addl DC leh Patron, State Day of Prayer ni bawk chuan hawnna thu a sawi a ni.

Pu James Lalnithanga chuan State Day of Prayer hmang thei tura Pathian khawngaihna changtu kan ni hi a lawmawm hle a, kalkhawm te chu   tawngtainain thil a tihtheihzia hretute an nih angin vawiina  tawngtaina hi Pathianin a hriain a chhansak ngei ka ring tlat a ni a ti, kan hotuten tawngtai thupui pawimawh tak tak an rawn thlan chhuah bakah Champhai chu ramri depa awm a nih avangin dan lova ramri kan thuahte, ruihhlo tih leh tawlhruk te, sumdawnna leh eizawnna kawngahte Pathian duh dan anga kan tihtheina tur leh kan hmuingil theihna turin tawngtai hi a pawimawh hle a ni a ti bawk. Champhai District chhunga sorkar hnathawk zawng zawngten rinawm tak leh dik taka mipuite tan hna kan thawha finna leh rorel thiamna kan neih  theihnan Pathian tanpuina an mamawh thusawiin tawngtaipui turin a sawm bawk a ni.

Vawiin tawngtai rual hunah hian Rev. Lalhmingthanga Chhangte, PCI  Bethel Bialtuin 'I din thar leh ang u' tih thupui hmangin thusawina a nei a, Upa Dr PC Biaksiama pawhin thu a sawi bawk a ni. Tawngtai rualna hun hi hun thumah then a ni a, Rev Vanlalnghaka Jongte BCM, Vice Charman State Day of Prayer, Rev T. Sawm Lian, ZBC, Jt Secretary State Day of Prayer, Rev Zairemtluanga PCI Zotlang Bialtu ten thupui pawimawh tak tak hmangin tawngtai rualna hi an kaihruai a ni. He hunah hian PCI Champhai Kanan Kohhran Zaipawl, Champhai Bible College Zaipawl leh Pu Lalruatfela Pachuau ten Pathian falna hla sain  zaikhawmna hun a tam thei ang bera hman a ni bawk. Upa K. Lalrintluanga, Treasurer, State Day of Prayer in lawmthu sawiin, Pastor Tluangzapaua Assembly of God chuan malsawm tawngtainain hun a khar a ni.