1030/2026-2027

Dated Champhai, 16th June 2026: Stop Diarrhoea Campaign 2026 chu vawiin khan Govt. Primary School I, Champhaiah Bawrhsap Pu Mohammad Aaquib chuan a hawng.

Bawrhsap chuan thu sawiin, kawthalo hian naupangte ah thihna hial a thlen ve theih avangin ngaihpawimawh a tul thu a sawi a, kawthalo laka kan invenna atana pawimawh hmasa ber chu kut silfai, a ti a, chaw ei hma leh chaw ei zawh bakah inthiar zawhah fai taka kut sil thin tur a nih thu a sawi a, Health Department a thawkte tih turah chauh dah tur a ni lova, nu leh pa te bakah zirtirtute pawhin mawhphurhna an nei tih a sawi a, kan in leh a bul vel tihvai te, tui thianghlim chauh in tur leh kua a tha lo a nih chuan inentir nachang hriat leh ORS leh Zinc ei/in nachang hriat a pawimawh thu a sawi a.

Champhai District atanga kawthalo natna umbo a nih theih nan leh kawthalo vanga thihna a thlen tawh loh na turin Stop Diarrhoea Campaign hi a hawng a ni.

He hun hi Dr. Walter Lalnuntluanga Sailo, CMO chuan kaihruaiin khawtha lo avanga dam lo tam tak an awm tih sawiin thihna thlen phuk phuk lo mahse kawtha lo avang hian chhungkaw tam tak in harsatna an tawh thu leh kawthalo hi amaha lo awm tawp ni lovin kan thil tih danin a zir leh zir lohah a innghah thu a sawi a, kawthalo laka invenna leh inenkawl dante a tarlang.

Dr. Lalramhluna, Dy. CMO chuan Stop Diarrhoea Campaign 2026 chungchang a sawi zau a, Champhai District ah nikum chhung khan naupang 813 khawthalo avangin an dam lova, an zinga 2 te chuan nunna an chan tih a tarlang a, kawthalo hi tihdam theih leh ven theih niin kan nunna atana hlauhawm ber chu taksa ah dehydration a thlen theih vang tih a tarlang.

Kawthalo laka inven nan rhil pathum ORS, Zinc leh kutsilfai a pawimawh thu a sawi a, kua a that loh velah ORS in nghal vat thin tur tih tarlangin ORS bakah zinc ei dan tur leh fai taka kut sil a pawimawhna a tarlang tel bawk.

ORS, Zinc leh fai taka kut sil hian kawthalo lakah min ven theih avangin chhungkaw tinin ngaihpawimawh a tul tih a sawi a, ORS leh Zinc te hi kawl reng a tul thu sawiin, hetianga chhungkaw tinin kan tih chuan kan khua atangin kawthalo hri kan umbo thei dawn, a ti.

Health Worker, ASHA leh Anganwadi worker te chuan fai taka kut sil dan an zirtir a ni.

Stop Diarrhoea Campaign ah hian Kawthalo ven nan faina leh ORS a pawimawh tih chu thupui atan hman a ni a, vawiin atangin Campaign hi kawng hrang hrangin kalpui nghal a ni dawn a, thla khat chhung a awh dawn a ni