1031/2026-2027

Aizawl, 16th June,2026 : Vawiin khan Department of Agriculture & Farmers’ Welfare in Mission Organic Mizoram kaltlanga hma a lakna - Mission Organic Value Chain Development for North Eastern Region (MOVCD-NER) hnuaia Mizorama Farmer Producer Company din - Tlabung Turmeric Farmer Producer Company Ltd., Zodin, Tlabung te chuan an aieng tharchhuah cheng nuai 26.6 man hu an hralh a. Dr. KC Lalmalsawmzauva, Adviser To Chief Minister chuan Ch. Saprawnga Truck Terminal, Rangvamual, Aizawl aṭangin a vailiam.

He programme-ah hian Pu KC Lalmalsawmzauva chuan thusawiin Organic Aieng ro, Mission Organic Mizoram (MOM) te hmalakna chu lawmawm a ti a. Sawrkarin thlai thlan bik market an buaipuina kawnga thil pawimawh ber pakhat chu Chemical tel lo - Organic a nih thu sawiin, Mizoram chu Organic State a siam tumin hma lak mek a nih thu a sawi.

Khuallian chuan Khawvel changkang zelah mihringte kan duhtuiin, eitura damdawi leh chemical telh chu a hnawng chho zel a. India sawrkar pawhin hei hi ngaipawimawhin, chemical tel lo National Mission on Natural Farming atan cheng vaibelchhe 750/- lai buget-ah a dah thu sawiin, Mizoram-ah pawh khaw engemaw zatah kalpui turin Agriculture Department ten hma an la mek a ni, a ti.

Khuallian chuan India ram hmun dangte khaikhinin Mizoram chu chemical hman tlemna ram a ni a, hei hi advantage-ah lain state dang te aia market-a Mizoramin hming a chherna tur hun rangkachak a ni tih a sawi a. Tlaichingtute zingah Chemical lo hmang thin an awm a nih pawhin bansan a, Organic farming lama kal turin a sawm a; Khuallian chuan "Sawrkarin Organic thlai chauh Support Price a pek hun a la awm mai theia; chutih huna kan buai loh nan thlai chingtute chu chemical bansan turin ka sawm nghal che u a ni", a ti. Chemical tel lo lei tha Biofertilizers heng-Ran Ek, Bamboo leh Wood vinegar-te uar takin kalpui turin leh hemi lama project nei thate chuan rawn in report-a, Handholding a kalpui dan an ngaihtuah tur thu a sawi bawk.

MOVCDNER Phase IV hnuaia Tlabung Turmeric Farmer Producer Company Ltd., Lunglei District chuan aieng tharchhuah cheng nuai 26.6 man chu Assam lama buyer hnenah an thawnchhuak a. Tlabung FPC hian Dried Turmeric Finger, metric tonne 25 chu kg ah cheng ₹106.4/- zela hralhin, cheng nuai ₹26.6 zet an hmuchhuak a ni. Tlabung Turmeric FPC Ltd. hnuaiah hian organic aieng chingtu intelkhawm member 500 an awm mek.

MOVCD- NER hi State Lead Agency Mission Organic Mizoram, Department of Agriculture & Farmers’ Welfare te hmalakna niin, tun dinhmunah hian Phase III zawhfel tawh a ni a, Phase IV kalpui leh mek niin, tun thleng hian organic FPC 41 ziah luh tawh an ni a, heng FPC 41 hnuaiah hian organic farmer 27,604 ziahluh an lo ni tawh bawk.

Chemical tel inputs - rannung thahna hlo, hnim hlo leh chemical atanga siam leitha hman nasat lutuk avangte leh recommended dose aia tam hman thin a nih avang ten thlai tharchhuah te hi mihring ei tlak lova chhuah a hlauhawm hle a, heng venna tur leh thlai hrisel, mihring ei tlak ngei chauh tharchhuak turin Mission Organic Mizoram chuan hma a la mek a ni.

Vawiin Department of Agriculture & Farmers’ Welfare in Mission Organic Mizoram buatsaih programme hi Pi Vanramthangi, Director, Agriculture & Farmers Welfare Dept. & Mission Director, MOM chuan kaihruaiin, MOM State Coordinator Pi Baby Lalremkimi chuan technical report a pe a. He programme-ah hian Pi R. Lalramhluni, Jt. Director, Agriculture & Farmers Welfare Dept. te, Pu Lalengliana, Jt. Director, Agriculture & Farmers Welfare Dept.te,  Pu Lalhmingmuana, Managing Director, MAMB te, Pu Ngurrinsanga Sailo, Jt. Director, Agriculture & Farmers Welfare Dept. te, Pu Dr. David Fangzauva, Dy. Managing Director, MAMB leh MOVCDNER enkawltu MOM aṭangin State Coordinator Pi Baby Lalremkimi bakah MOM Staff te leh MOM hnuaia Tlabung Turmeric FPC Ltd. CEO Barnabas Hembrom leh Service Provider Yahsowati Bio Multi-tech Unit - II te an tel bawk a ni.